VSA RUIL KENNIS OOR VOËLGRIEP UIT MET AFRIKA
DIE Amerikaanse pluimveebedryf weet vandag dat hy drie jaar gelede die regte besluit geneem het om nié pluimvee teen voëlgriep in te ent nie.
Só het mnr. Jim Sumner, voorsitter van die Amerikaanse raad vir die uitvoer van pluimvee en eiers (USAPEEC), op ’n besoek aan Suid-Afrika gesê.
Sy besoek het saamgeval met ’n inligtingsessie oor twee dae waar Amerikaanse voëlgriepdeskundiges in Pretoria hul kennis en ervaring met senior amptenare van nege Afrikalande uitgeruil het.
Sumner het op ’n mediageleentheid gesê elke land se situasie verskil en elke land moet daarom self oor inenting besluit.
In Amerika het die bedrywe vir kalkoen en eiers in 2014 inenting voorgestaan, maar die braaihoenderbedryf en Sumner self was daarteen gekant.“Ons het geweet dit is nie 100% doeltreffend nie en was bewus van die handelsgevolge wat dit sou hê.
“Volgens ons ervaring was ontvolking baie doeltreffender. As jy ’n siek hoender het, maak dit dood en begrawe dit.”
Sumner sê as ’n land sou besluit om pluimvee in te ent, is dit belangrik om die entstof behoorlik te kan toedien. Dit is ’n duur en arbeidsintensiewe proses.
Verder kan die virus, soos enige ander virus, voortdurend verander en muteer, en moet die inenting van pluimvee dus ook voortdurend aangepas word.
Volgens hom is dit belangrik om ’n uitvoeringsplan te hê as ’n land sou besluit om pluimvee in te ent. “Baie van die lande wat besluit het om pluimvee in te ent, doen dit 15 jaar later steeds en hulle sal na verwagting voortgaan daarmee.”
Inenting voorkom nie dat hoenders die virus kry nie en maak dit moeiliker om vas te stel of hoenders die virus onder lede het. Daarom laat die meeste lande nie invoer toe uit lande wat hul pluimvee inent nie.
BIOSEKERHEID
Dr. Fidelis Hegngi, senior veeartsenykundige beampte van die Amerikaanse departement van landbou, het volgens ’n verklaring van die USAPEEC aan afgevaardigdes van die Afrikalande gesê daar behoort slegs 24 uur te verstryk tussen die opsporing van voëlgriep en daaropvolgende ontvolking van pluimvee.
In Afrika is die grootste probleme volgens hom vertragings in die aanmelding van en reaksie op uitbrekings, terwyl die algemene gebruik om hoenders lewend te verkoop, ook groot probleme ten opsigte van biosekerheid meebring.
In Amerika word boere deur die regering vergoed vir die hoenders wat hulle weens voëlgriep verloor, wat terselfdertyd as aansporing vir vroeë aanmelding van die siekte dien.
Hegngi het gesê opvoeding oor basiese biosekerheid is noodsaaklik, veral onder klein pluimveeboere. “Voëlgriep is ’n probleem wat van tyd tot tyd in alle lande voorkom en stamme daarvan, soos die hoogs aansteeklike H5N1, hou ’n ernstige risiko vir mens én dier in.
“Die belangrikste is om nie toe te laat dat dit endemies en dan pandemies word nie.” Hegngi het gesê lande moet kennis met mekaar uitruil.