HOF BESLIS IN BOER SE GUNS OOR TB-DIAGNOSE
BUFFELEIENAARS en die staat sal weer dringend moet samesprekings voer oor die toets van siektes onder wild en die interpretasie van die uitslae daarvan.
Dit volg nadat die staat se veterinêre prosedurele kennisgewing (VPN) vir die risikobeheer van buffelsiektes in Suid-Afrika voorlopig in die Noord-Gautengse Hooggeregshof in Pretoria tersyde gestel is.
Regter Vivian Tlhapi het gelas dat die vorige buffelprotokol (nr. 20) intussen van krag bly en dat die VPN van die direktoraat dieregesondheid van die Departement van Landbou, Bosbou en Visserye ’n onwettige dokument was omdat dit nie deur die minister goedgekeur is nie.
Die dringende hofaansoek is deur mnr. Jaco Troskie, ’n sakeman van Bloemfontein, gebring. Volgens hom het hy die aansoek vir die opskorting van dié voorskrifte vir die wildbedryf in Suid-Afrika gedoen, sodat ’n aanvaarbare voorstel vir ’n nuwe regulasie met die samewerking van boere, veeartse en die staat opgestel kan word.
Troskie se regspan het aangevoer dat die helfte van Suid-Afrika se buffelbevolking ingevolge die departement se oorgevoelige VPN positief vir tuberkulose (TB) sou toets. Hy het aangevoer dat die bepalings van die VPN onwetenskaplik en ondeurdag was en dat vergelykende toetse wat vals reaksies in die toetse sou uitskakel, nie meer in ag geneem is nie. Intussen het buffeleienaars hulle bereid verklaar om met die samewerking van die staat ’n werkbare dokument op te stel om dieresiektes te bekamp. “Ons wil baie graag die harde werk wat oor jare gedoen is, voortsit en die konstruktiewe sinergie en momentum wat bereik is, behou,” lui ’n verklaring. “Ons wil dit sterk beklemtoon dat ons opreg samesprekings met die direktoraat dieregesondheid wil voer en as vennote saam aan die toekoms van die buffelbedryf wil werk.”
Mnr. Reuben Saayman, uitvoerende hoof van Buffalo Ranch in Bloemfontein, en voorsitter van die Buffeleienaarsadvieskomitee van Wildbedryf Suid-Afrika (WRSA), sê goeie vordering is gemaak en ’n komitee vir beheerde siektes by buffels is tot stand gebring wat deur die nasionale dieregesondheidsforum verteenwoordig word. Dié komitee sal onder meer alle buffeleienaars, die WRSA, wildveeartse, die direktoraat dieregesondheid, nasionale parke, provinsiale reservate en die Universiteit van Pretoria verteenwoordig.
“Hierdie komitee sal graag voortaan met die staat en ander belanghebbendes saamwerk, veral oor die toekoms en voorstelle wat in die verlede nie aanvaar is nie en wat nou probleme veroorsaak,” sê Saayman.
–