BRANDEWYN SE BRIEKE IS LOS
TEKENS van ’n opflikkering in die brandewynbedryf is goeie nuus vir die breër wynbedryf, en hou ook groot geleenthede in vir Distell, een van die wêreld se grootste brandewynprodusente.
“Distell het stewige bedryfsresultate vir die jaar getoon, veral gegewe die agtergrond van resessionêre druk op plaaslike verbruikers en ’n meer mededingende internasionale landskap,” het mnr. Richard Ruston, besturende direkteur van Distell, gesê.
Die maatskappy se inkomste het met 3,7% tot R22,3 miljard gestyg. ’n Dividend van R3,79 is verklaar. Hooflynverdienste het met 3,6% tot R1,6 miljard gedaal. Op die tuisfront het inkomste met 7,8% en verkoopsvolume met 1,5% gestyg.
Die spiritualieëkategorie het sterk inkomste en volumegroei getoon, en die wynportefeulje het ook beter gevaar wat inkomste én volume betref.
WYNHANDELSMERKE GROEI BELOWEND
Durbanville Hills, een van Distell se wynhandelsmerke, het volumegroei van bykans 77% getoon. Dié handelsmerk kon ook, soos Alto, vooruitgang op internasionale markte maak. Die snelgroeiende 4th Streethandelsmerk het sy bullopie in Afrika suid van die Sahara en SuidAfrika voortgesit.
DUBBELSYFERGROEI
Dit wil voorkom asof die dalende neiging in plaaslike brandewynverbruik vir eers in sy spore gestuit is. Viceroy het die afgelope jaar dubbelsyfer groei getoon. Distell is die sesde grootste brandewynprodusent ter wêreld.
“Die brandewynkategorie bly vir ons geweldig belangrik wat inkomste en wins betref. Dis ook ’n ongelooflike produk vir die wynbedryf. Dit bied baie aan wynboere wat volhoubaarheid en kontantvloei betref. Brandewyn speel ’n rol in die breër wyngemeenskap waarvan ons nie kan vergeet nie.”
Dit verg sowat vyf liter wyn om een liter brandewyn te maak.
Ruston sê die maatskappy het ná baie debatte besluit om die afgelope drie jaar nie die prys van Viceroy se vyf jaar oue brandewyn te verhoog nie. Dit was deel van die strategie om die brandewynkategorie te laat herleef.
“Ons het besef ons moet verbruikers teruglok na die brande wynkategorie. Viceroy is ’n sterk hoofstroomhandelsmerk. Dis nie streeksgebonde nie, maar reg oor die land gewild, daarom het ons besluit dis die handelsmerk wat sal moet help om nuwe, swart, stedelike verbuikers te lok.”
Volgens hom het dit beteken Distell moes wins opoffer.
“Die groei was egter ongelooflik sterk en die momentum in daardie deel van die mark is baie belangrik vir brandewyn.”
Die algehele volume in die maatskappy se brandewynkategorie het met sowat 5% toegeneem. Richelieu en Klipdrift se volume het stabiel gebly.
Volgens Ruston moet hulle nou dié momentum gebruik om verbruikers ook na meer premiehandelsmerke (soos Klipdrift) te trek.
‘Dit wil voorkom asof die dalende neiging in plaaslike brandewynverbruik vir eers in sy spore gestuit is.'