AUSSIES KRY KRITIEK OOR MULE SE OPERASIE

KLEREVERVAARDIGERS en verbruikers begin al hoe meer druk op die wolbedryf plaas om te bewys dat die wol wat hulle verskaf, eties geproduseer en die skape se versorging in ag geneem is.

Dit is veral Australië wat deurloop omdat hulle steeds nie ’n oplossing vir Mule se operasie gevind het nie.

Dié operasie behels die verwydering van los vel vir die voorkoming van brommeraanvalle en word steeds algemeen uitgevoer.

Nou het Australië se grootste woluitvoerder gewaarsku dat die bedryf se versuim om sy eie kode vir beste praktyke op te stel tot ’n “ontploffing” van onrealistiese vereistes deur kleinhandelsgroepe gelei het. Dit kan op die bedryf afgedwing word. Mnr. Josh Lamb, bestuurder van Techwool Trading wat verlede seisoen meer as 255 000 bale wol gekoop het, sê die kleinhandelgroep H&M is die jongste groep wat ’n onafhanklike verklaring oor dieresorg opgestel het.

Die vereistes in dié verklarings is nie altyd prakties uitvoerbaar nie, sê hy. Een verklaring vra byvoorbeeld vir die geskiedenis van boere se skaapkuddes oor die afgelope honderd jaar en waarborge dat die skape nie tydens die skeerproses beseer is nie.

“Die bedryf moet die leiding neem en self ’n kode vir beste praktyke opstel.”

Net 60% van Australië se wolboere het verlede seisoen die nasionale wolverklarings van die Australiese wolbeurs ingevul. Daarin moet hulle aandui of hulle Mule se operasie uitvoer en of hulle pynstillers toedien.

Lamb se waarskuwing volg ná druk van die Australiese vleisbedryf om ’n strategiese navorsingsen bemarkingsplan plan op te stel om die ongunstige indrukke oor Mule se operasie reg te stel.

Suid-Afrika, waar die operasie onbekend is, het in 2012 reeds ’n verklaring opgestel wat boere moet onderteken om te bevestig dat hulle nie dié operasie uitvoer nie. Dit is op Cape Wools se webblad by www.capewools.

co.za beskikbaar.