IS ARMES DIE TOEKOMS VAN DIE SUIWELBEDRYF?
Die suiwelbedryf het ’n groot geleentheid om na armes uit te reik, sê mnr. Yusuf Lambada, Woolworths se bestuurder van suiwelproduk-aankope.
Die hele bedryf moet dan egter betrokke raak en bereid wees om winsmarges in daardie deel van die mark te verlaag, het hy op ’n vergadering van die SA Suiweltegnologie-vereniging in Kaapstad gesê.
“Die bedryf is gelaai met koste. Van die boer, wat die maksimum produksie moet verseker, tot die verwerker wat die beste moontlike produk moet vervaardig, tot die kleinhandelaar wat die produk so goed as moontlik moet aanbied. Die verbruiker is nie bewus van hierdie koste en die mate waartoe al die faktore binne dae skielik kan verander nie.
“Verbruikers verwag verder dat die prys van suiwelprodukte konstant moet bly en boonop is hulle ongelooflik prysgevoelig. Die bedryf is dus uiters mededingend en dit plaas druk op almal in die waardeketting. Die mense wat tans suiwel verbruik, gaan nie in die toekoms hul verbruik van suiwelprodukte vermeerder nie.
“Die bedryf se grootste groei gaan kom uit die armer gemeenskappe wat nie baie suiwel per kop verbruik nie. Daarin lê ’n reusegeleentheid vir die bedryf. Die geheim is om aan hierdie mense ’n produk te lewer wat vir hulle goeie waarde vir hul beperkte besteebare inkomste sal gee.” sê Yusuf.
Volgens mnr Koos Coetsee, ekonoom van die MPO, onderskat Yusuf moontlik die koopkrag van die informele mark. “Die informele mark koop die bekende handelsmerke ten duurste aan omdat dit betroubare gehalte is. Daar is buitendien nie veel vet aan die boer se kant om nou aan marges te sny nie.”
Mnr. Gielie de Kock, melkboer van Witsand, stem saam met Yusuf, en voeg by dat die mark beter verstaan moet word. “Ons moet verstaan watter waarde onverwerkte melk vir tradisionele Afrika-kulture dra. Voedselveiligheid-versekering van onverwerkte melk, die regte produk op die regte plek en waarde vir geld sal dus die belangrikste aspekte in hierdie mark wees,” sê Gielie. Yusuf het die bedryf aangemoedig om met ’n doelgerigte benadering tot verskaffing nuwe markte te ontwikkel. “Die produkte en voorsieningskanale wat tans bestaan, gaan nie die bykans 50% van Suid-Afrika se bevolking wat nie veel suiwel verbruik nie, oortuig om meer van ons produkte te verbruik nie en ons bedryf het die uitbreiding van die mark dringend nodig,” sê Yusuf.