OP DIE PLAAS
Dr. Koos Coetzee, ekonoom van die Melkprodusente-organisasie (MPO), sê hoewel Suid-Afrikaanse pryse minder wisselvallig is as internasionale pryse, moet produsente besef dat pryse siklies is. “Goeie tye met hoë pryse moet met omsigtigheid geniet word.”
Koos sê graanpryse gaan waarskynlik stadiger as veeprodukpryse styg. “Dit beteken betreklik beter winsgewendheid vir melkprodusente, maar groter doeltreffendheid sal steeds nodig wees.
“Verskansing teen graanprysskommelinge behoort deel van toekomstige strategieë te wees.” As deel van doeltreffendheid moet boere ook goeie siektebestuur toepas. Dr. Chris van Dijk, uitvoerende hoof van die MPO, sê vroeëre berigte uit die Suid-Kaap dat sowat 50 beeste in een kudde vermoedelik aan botulisme dood is nadat hulle aan hoendermis blootgestel is, het die noodsaaklikheid van doeltreffende kuddegesondheidsbestuur beklemtoon. “Dit is nou des te noodsaakliker om kuddegesondheidsprogramme te volg wat in normale toestande aanbeveel word. Hierdie praktyk sluit inenting met multiklostridiale entstowwe in om klostridiale siektes te voorkom. Dié siektes sal na alle waarskynlikheid veel eerder voorkom in situasies waar daar skielike veranderings in voertipe, -gehalte of -hoeveelheid is. “Alle noodsaaklike entstowwe moet geldig wees en diere, veral jong vee, moet gedoseer word om inwendige parasiete (onder meer lewerslak in gebiede waar dit voorkom) uit te wis. “Bykomende praktyke wat tydens droogtetye aanbeveel word, sluit vitamienaanvullings in,” sê Chris.