INTERNASIONAAL
Internasionale pryse van suiwelprodukte het luidens die BFAP-verslag vanjaar ietwat herstel tot vlakke waar dit laas in 2014 was. In die vorige twee jaar was die vraag uit China swakker en Rusland het ’n embargo op invoer gehad. Dit, tesame met hoër produksie in die Europese Unie (EU), het pryse tot die laagste vlak in sewe jaar laat daal.
In die volgende tien jaar sal die groei in die aanbod waarskynlik matig wees. EU-produsente sal na verwagting hul produksie volgens markneigings aanpas, terwyl omgewingsbeperkinge groei sal beperk.
Die Organisasie vir Ekonomiese Samewerking en Ontwikkeling (Oeso) en die Verenigde Nasies se Voedsel- en Landbou-organisasie verwag dat meer as die helfte van die wêreld se groei in melkproduksie in die volgende dekade in die ontwikkelende wêreld gaan wees.
Die wêreldprys van kaas sal na verwagting vanjaar met 14% styg en dié van volroommelkpoeier met 23%. Daarna kan dit op 2012-vlakke stabiliseer. Klimaatswisselinge of veranderinge in die vraagpatrone van belangrike kopers, soos China, Rusland en lande in die Midde-Ooste, kan egter tot groot wisselvalligheid lei.
Mnr. Alwyn Kraamwinkel van Sampro sê regeringsmaatreëls in belangrike suiwellande wat inmeng met die ideaal dat die aanbod die vraag moet volg, asook politieke optrede en skielike veranderinge in die ekonomiese groeikoers van belangrike invoerlande, het ’n groot invloed.