Landbousektor groei danksy somerreën
Die landbousektor is die afgelope paar weke geprys as dié sakesektor wat Suid-Afrika uit die tegniese resessie help trek het. In dié promosie-afdeling val die kollig op landboumaatskappye wat wêreldklasdiens en -produkte lewer om tot dié sukses by te dra.
Die somerreëngebied het hierdie seisoen uit sy nate gebars met graanproduksie wat alle verwagtinge oortref het. Goeie advies en betroubare produkte wat gewasse en vee beskerm, is in ’n hersteljaar soos vanjaar van onskatbare waarde.
Die sewende produksievooruitskatting van Graan SA se Oesskattingskomitee dui aan die 2017-’18-seisoen gaan puik resultate lewer. Vir diensverskaffers aan graanboere in die binneland is dit ook goeie nuus, want die vraag na bedryfsmiddele gaan toeneem.
Die rekordmielie-oes het mieliepryse skerp laat daal en boere kyk nou na sojabone en sonneblomme om hul inkomste per hektaar te verbeter. Volgens die vooruitskatting sal sojaboonproduksie met 77% (1,316 miljoen ton) toeneem. Sonneblomproduksie in die 2017-’18-seisoen sal na verwagting met 15% (870 000 ton) toeneem.
WINTERREËN
Die droogte knel steeds die drie Kaapse provinsies. Veral die winterreëngebiede trek swaar. Ook in die Oos-Kaapse streke waar reën bykans reg deur die jaar moet val, is dit droog. Die situasie vir boere in dié provinsies is benard en die vooruitsig dat besproeiing gestaak moet word, voorspel swarigheid vir groente-, vrugte- en wynboere.
Maatskappye wat toegespits is op gewasbeskerming en dieregesondheid, asook diensverskaffers wat na presisieboerdery vir bespoeiingsboere kyk, kan ’n groot bydrae lewer.
SOMERSAAIGEBIED
Nuwe masjinerie wat akkurater werk, is vir boere belangrik. Die goeie jaar in die grootste gedeelte van die somersaaigebied word weerspieël in die getal trekkers en stropers wat al verkoop is. Hoewel die nadraai van die droogte in die binneland steeds finansiële druk op boere plaas, het die reën hoop laat opvlam.
Die Suid-Afrikaanse Landboumasjinerie-assosiasie (Salma) sê in sy jongste verslag stroperverkope het in Augustus met 100% verbeter teenoor verlede jaar in dieselfde maand. Verlede Augustus is ses stropers verkoop en vanjaar 12. Vir die jaar tot Augustus is verkoopsyfers 13% beter op ’n jaargrondslag met 18 méér stropereenhede wat verkoop is.
Die hoop is dat 2013 se goeie syfers geëwenaar sal word. Toe is 351 stropers en 7 517 trekkers volgens Salma se syfers verkoop.
Trekkerverkope tel ook mooi kop op. Verlede jaar is 450 eenhede in Augustus verkoop en vanjaar is 583 trekkers verkoop. Dit is ’n toename van 26,7%.
“Met die rekordmielie-oes van 16,4 miljoen ton wat byna klaar geoes is en met die landbou wat baie bygedra het tot die welkome groei in Suid-Afrika se bruto binnelandse produk vir die tweede kwartaal, bly die mark hoopvol,” sê mnr. Lucas Groenewald, voorsitter van Salma.
“Boere wat weet hulle gaan toerusting in die komende somergewasseisoen nodig hê, benut die geleentheid om toerusting wat ingevoer is toe die rand sterker was, teen laer pryse aan te koop. Maar boere moet steeds hul insetkoste noukeurig oorweeg en aanplantbesluite op daardie ramings grond. Ramings vir vanjaar dui daarop dat trekkerverkope hoër kan wees as verkope verlede jaar en dat verkope selfs meer as 6 000 eenhede kan wees.”