WILD MOET TERUG

NAGENOEG R100 miljoen se buffels, swartwitpense en njalas wat deur Noordwes se departement van landelike, omgewings- en landbou-ontwikkeling aan die maatskappy SA Rare Game Breeders Holdings (SARGB) geskenk is, moet teruggee word. Die maatskappy se stigters het blykbaar sterk bande met die ANC.

Boonop sal me. Manketsi Tlhape, LUR, en ander amptenare wat by die transaksie betrokke

was, persoonlik vir die “vrugtelose uitgawe” verantwoordelik gehou word wat met die verskuiwing van die diere gepaardgegaan het.

Dit is die oplossing waarmee die Parlement se portefeuljekomitee vir omgewingsake en die een vir landbou vorendag gekom het nadat wild “onwettig” aan die maatskappy geskenk is. Die komitee vir omgewingsake sukkel al sedert verlede jaar om uit te pluis hoe dit gebeur het dat die 130 buffels, 50 witrenosters en 32 njalas uit twee provinsiale parke, Molemane Eye en Borakalalo, in die maatskappy se besit beland het.

Die betrokke departement in Noordwes het die skenking glo gedoen ingevolge ’n “wildskenkingsbeleid”. Dié beleid is in 2010 ontwikkel en aan die bewaringskomitee van Noordwes se destydse Parke en Toerismeraad voorgelê, maar is volgens die samesteller van die beleid nooit goedgekeur nie. Dit beteken dat enige transaksies wat ingevolge die beleid gedoen is, onwettig is.

VERSKUIWING

Met die verskuiwing van die wild is die twee regeringsparke boonop sonder teelmateriaal gelaat toe ál die buffelkoeie aan die SARGB gestuur is.

Dit het in ’n ondersoek na die transaksie na vore gekom dat die wild reeds van Julie 2015 af na die SARGB gestuur is, terwyl die skenking eers in Junie verlede jaar “goedgekeur” is. Die stigters van die maatskappy het glo ook eers in Julie 2015 ’n aandeelhoudingsooreenkoms gesluit om die SARGB te vorm. Die portefeuljekomitee het onderneem om vas te stel of die werkers – wat 50% van die onderneming besit – ooit van die aandeelhouding bewus is.