WEMASAAD HET NOG NIE EIENAARSKAPBESKERMING

DIE eerste 10 000 pakkies droogteverdraagsame saad van 500 g elk wat die Landbounavorsingsraad (LNR) in 2014-’15 gratis aan kleinboere in Limpopo, Mpumalanga, Noordwes, die Vrystaat en KwaZulu-Natal gegee het om te toets, het goeie opbrengste opgelewer.

Tog het geen van dié droogteverdraagsame witmieliebastersaad wat deur die LNR se projek vir Waterdoeltreffende mielies vir Afrika (Wema) ontwikkel is, al intellektuele eienaarskapbeskerming ingevolge die wet nie.

Mnr. Senzeni Zokwana, Minister van Landbou, Bosbou en Visserye, het in ’n parlementêre antwoord gesê sy departement het verlede September vyf aansoeke vir die geneties gemodifiseerde Wema-kultivars gekry. Dit word volgens hom steeds oorweeg.

Die aansoekers is die LNR en die African Agricultural Technology Foundation in Kenia.

OPNAME TRAAG

Hoewel die droogteverdraagsame saad met groot ophef in 2014 bekend gestel is, was daar in 2015-’16 geen saad vir aanplantings op kommersiële skaal beskikbaar nie.

Die Departement van Landbou, Bosbou en Visserye het einde Oktober verlede jaar aan parlementslede wat vrae oor die beskikbaarheid van die saad gehad het, gesê 70 000 ton van die saad sal onder kleinboere versprei word.

Zokwana het toe ook aangedui dat die meeste van die swart boere nie nog meer van die saad aanplant nie. “Die departement het gewillige boere met ondernemingsgees nodig om die saad te plant.” In Maart vanjaar het die departement aangedui dat sekere provinsies die droogteverdraagsame saad vir aanplanting bestel het. Dit is glo gedoen met geld van die Ilima/Letsema-projek. Hulle het aangedui hulle was gereed om te plant.