TEKORT AAN MEDISYNE WEENS TALLE FAKTORE

’n Winter wat oor die algemeen in die somerreëngebied nie uitsonderlik koud was nie, ’n natterige voorjaar en ’n vroeë, warm lente dra by tot die voorkoms van inwendige en uitwendige parasiete wat meebring dat die verskaffers van veemedisyne nie kan bybly nie.

Mnr. Willem Kleyn van MSD-dieregesondheid sê ’n betreklik warm winter het parasiete maklik laat oorwinter wat met die aanbreek van die afgelope hittetoestande die verkope van veral dipstof die hoogte laat inskiet het.

Volgens sy beramings het sy maatskappy ’n verhoging van sowat 10% in die verkope van dipstof die afgelope kwartaal ondervind teenoor die ooreenstemmende tydperk die vorige jaar. In een van die promosies by ’n landboumaatskappy is 300 kanne dipstof van 20 liter verkoop teenoor 35 kanne die vorige jaar. Hy ondervind ’n groot vraag na opgietmiddels teen bosluise op wild en beeste.

Wateroplosbare dipstof wat maklik met sproeitoestelle toegedien kan word, is ook redelik in aanvraag onder opkomende boere.

Die gunstige toestande vir dieresiektes het ook die vraag na middels teen knopvelsiekte die hoogte laat inskiet.

Voerkrale, een van die groot afsetgebiede vir entstof en groeistimulante, is betreklik vol beeste teen ’n agtergrond van kuddebou onder telers ná die droogte.

Kleyn verwag dat dié neiging op die kort tot mediumtermyn sal voortduur indien die produksietoestande vir veeproduksie gunstig bly.