SWAK EKONOMIE DEMP VERKOPE
Die kleinhandelverkope van sekere melkprodukte het in die twaalf maande tot Junie vanjaar gedaal.
Van die produkte se pryse het in dieselfde tydperk ook met minder as die inflasiekoers gestyg.
“Die bogenoemde ongewone lae prestasie van suiwelprodukte in die kleinhandel is veral weens SuidAfrika se swak ekonomiese groei,” sê mnr. Alwyn Kraamwinkel, uitvoerende hoof van die SuidAfrikaanse Melkprosesseerdersorganisasie (Sampro).
Die trae ekonomiese groei het nie net verkope van suiwelprodukte geraak nie, maar ook voedselprodukte, soos ontbytgraan, rys, margarien en tee, sê hy.
Die verkope van nege suiwelprodukte word gemonitor, en ses daarvan was in die betrokke tydperk laer. Ál nege se kleinhandelspryse het gestyg, maar vier daarvan se stygings was laer as inflasie.
Vars en langlewemelk se pryse het onderskeidelik met net 4,8% en 0,3% gestyg.
Kraamwinkel sê produksie van onverwerkte melk was in die eerste agt maande van vanjaar hoër as in dieselfde tydperk verlede jaar, veral danksy hoër produksie in Januarie, Julie en Augustus.
In die komende maande sal produksie volgens hom grootliks beïnvloed word deur weersomstandighede, gegewe die ernstige droogte in sekere dele, en die vraag na suiwelprodukte, wat na verwagting onder druk gaan bly weens verwagte voortgesette swak ekonomiese groei.