POSDUIWE KRY HUPSTOOT
’n Toekenning van R250 000 deur die Nasionale Lotery aan die Suid-Afrikaanse Nasionale Posduiforganisasie (Sanpo) stel dié organisasie in staat om die duiwesport deur die land te bevorder. Mnr. Johan Pretorius, sekretaris van Sanpo, sê die organisasie het ook vanjaar begroot om duiweboere op ’n mededingende vlak vir die wedvlugbedryf te werf deur hulle geldelik by te staan.
Sanpo sal na verwagting volgende Maart op sy volgende raadsvergadering en jaarvergadering in Bloemfontein projekte en veldtogte goedkeur.
Volgens Pretorius word die wedvlugprogramme van die meeste organisasies deur die land nou afgehandel. Een van die laaste wedvlugte wat die Pretoriase groep aanbied, is oor sowat 1 000 km vanaf Leeu-Gamka. Benewens lang afstande, word wedvlugte ook oor kort en medium-afstande afgelê. Die wedvlugprogram begin in die laaste naweek van Mei en duur 17 tot 20 weke aaneenlopend, meestal oor naweke, tot middel Oktober.
Volgens Pretorius is Sanpo se ledetal betreklik konstant met tot 4 500 lede.
Van die provinsiale organisasies sukkel egter met lede wat weens kostedruk nie mededingend aan die wedvlugduifsport kan deelneem nie. Prysstygings ten opsigte van brandstof, duiwekos en medisyne kan ’n teler met sowat 100 wedvlugduiwe maklik tot R40 000 per jaar uit die sak jaag om op ’n mededingende vlak deel te neem.