BOERDERY MET ’N STAMBOOM
Nes die Bonsmarastoetery wat mnr. Jan Boshoff bedryf, het die boerdery ’n stamboom soos min. Jan se pa, Chris, was een van die eerste lede en daarna direkteur in die destydse Oos-Transvaalse Koöperasie (OTK).
Jan het ook later self op die direksie van OTK gedien totdat die besigheid as die maatskappy OTK op die Johannesburgse Effektebeurs genoteer is. Tussendeur was hy eers betrokke by die plaaslike boerevereniging, daarna die Transvaalse distrikslandbou-unie en daarna in die algemene raad van die destydse SuidAfrikaanse Landbou-unie (SALU).
Hy was ook die stigtersvoorsitter van die Droëboneprodusente-organisasie (DPO). Dit was die kundigheid en kennis van ervare personeel by OTK se landbouontwikkelingsafdeling by wie Jan sy landboukennis uitgebrei het.
“Saam met die destydse Departement van Landbou het dié afdeling ’n voorligtingsdiens beskikbaar gestel en kursusse by die departement aangebied. Dié voorligtingsdiens is saamgestel deur gerekende name in die landbou, onder wie mnre. Francois Strydom, hoofbestuurder van Senwes, Gideon Anderson, voorsitter van die DPO, en Hendrik van Pletzen, tegniese bestuurder by Voermol.”
Sy deelname aan die georganiseerde landbou daarna was ’n manier om sy mede-landbouers in dieselfde hoedanigheid te ondersteun.
Vir die georganiseerde landbou het Jan net lof. “Ek dink nie mense besef dat die boere wat in diens staan van die georganiseerde landbou met groot opoffering ook in húl diens staan nie. Boere wat nie aan die georganiseerde landbou deelneem nie, kan hul kop in skaamte laat sak, want hulle kry al die voordeel verniet.”