Skerpioen gee Wuhlf ekstra angel
’n Nuwe toevoeging tot Wuhlf se reeks grondverskuiwingswerktuie is eersdaags beskikbaar. Die Skerpioen is ’n ratse skop-en-laaigraaf wat ideaal is om slote, gate en fondamente te grawe.
Wuhlf is ’n betroubare verskaffer van swaardienstoerusting vir die landbou-, bou-, mynbou- en bosboubedryf. Die maatskappy se gewilde reeks vurkhysers en laaigrawe, asook bybehore, soos ontbossers, baalvurke en snykoppe vir veldbestuur en baalhantering, word plaaslik vervaardig.
Die insluiting van die Skerpioen by sy bestaande reeks vurkhysers en laaigrawe vul dié aanbod goed aan. Dié nuweling kos R513 000 (BTW ingesluit). Die agterste skopgraaf grawe maklik akkurate gate of slote, en met die voorste laaigraaf word die rommel vinnig weggery.
Die nuwe Skerpioen met sy 42 kW-enjin sluit aan by Wuhlf se betroubare, robuuste masjinerie. Boere kan staatmaak op ’n eenvoudige, hardwerkende masjien wat reg staan om moeilike take baas te raak.
SKERPIOEN
Die Skerpioen se skopgraaf het ’n bewegende arm met ’n draaihoek van 160° en kan binne 3,5 sekondes tot ’n hoogte van 3,7 m reik. Die arm sak vanaf sy maksimum hoogte tot op die grond binne 2,5 sekondes.
Die skopgraaf is 0,6 m wyd en kan ’n gat van tot 3 m diep grawe. Die laaigraaf se bak is 1,78 m wyd en kan 1,6 ton laai.
Stabiliserende bene hou die Skerpioen stewig in posisie tydens die grawery.
Die Skerpioen het ’n wielbasis van 2,07 m en is 6,6 m in lengte (met die skopgraaf en laaigraaf ingereken). Die masjien is 2,76 m hoog en met die skopgraaf is nog ’n bietjie ekstra ruimte nodig om die volle hoogte van 3 m onderdak te kry.
HULP EN DIENS
Wuhlf bied ongeëwenaarde waarde in die bedryf en sy produkte is dikwels tot 30% goedkoper as enige van sy mededingers s’n. Die ontwikkeling van die Skerpioen is nóg ’n voorbeeld van waar plaaslike vaardighede ingespan word om ’n robuuste produk vir Afrika te skep.
Die maatskappy is noord van Pretoria in die Wallmannstalgebied geleë. Die vervaardigingsaanleg verskaf ook onderdele en bybehore.
Voornemende kopers kan navraag doen oor watter aandrywingsmasjinerie met verskillende bybehore toegerus kan word. Die span staan gereed met advies oor en kwotasies vir nuwe aankope, maar ook die nodige naverkoopdiens.