Dis nóú tyd vir ploeg en plant!
Met die nuwe planttyd wat vir die binneland voorlê en ’n goeie oes agter die rug, is dit die ideale tyd om in nuwe werktuie te belê. Radium Engineering het verskeie opsies vir grondbewerking.
Met sy verspreidingsnetwerk in Suid-Afrika en buurlande is Radium in die ideale posisie om toerusting en werktuie vir Afrika se moeilike landboutoestande te bou.
Strooier-, grondbewerkingsen klipverwyderingstoerusting, asook swaailemsnyers, voermengers en padskrapers is deel van die reeks produkte.
POWERRIP
Die PowerRip-reeks is ’n praktiese en veelsydige oplossing vir konvensionele grondbewerkingstake. Die jongste weergawe van die PowerRip het die opsie om ’n dubbele stel rollers te gebruik. Verskillende modelgroottes is beskikbaar, wat vanaf vyf tande tot ’n wye skeurtandploeg met 15 tande kan wissel.
Die materiaal vloei maklik danksy die PowerRip se unieke tanduitleg. Dit verminder die aanpak van materiaal in die tanduitleg en verminder slytasie op die onderdele. Dié werktuie het ’n maksimum werksdiepte van 550 mm en ’n maksimum werkspoed van 7,5 km/h.
TWEETANDSKEURPLOEG
Radium Engineering het die behoefte aan diep grondbewerkingstoepassings in spoorverkeer in Suid-Afrika raakgesien. Die tweetandskeurploeg is ná vele proefnemings en toetslopies gebou en die gevolg is ’n ideale wortelsone van tot 1 000 mm diep, sonder syverdigting.
Die ideale kombinasie en grootte van ’n skaar is bepaal om die trekvereistes te verminder. Radium se nuwe ontwerp gebruik 40% minder energie.
Radium se tweetandskeurploeg skakel die aanpak van grond rondom en onder die skare uit sodat water en wortels die grond dieper kan indring vir verbeterde en bestendiger groei.
STROOIERREEKS
Radium het strooierwaens van verskillende groottes beskikbaar. Met hul verbeterde ontwerp kan dié strooiers kunsmis, kalk en droë mis vinniger en akkurater as voorheen strooi.
Die groottes van die reeks strooiers is uitgebrei en aangepas vir toepassing in boorde en wingerde, maar ook vir grootskaalse bemestingstoepassings vir saaiboere. Isobus-gereedheid skakel ook in by moderne tegnologie vir presisieboerdery.