Profert begin met nuwe era
Die Timac Agro-filiaal van die Franse groep Groupe Roullier het Profert se belange in Suid-Afrika oorgeneem. Profert is baie opgewonde oor hierdie vennootskap en hoe dit sy markposisie gaan versterk.
Profert het baie jare ervaring in die Suid-Afrikaanse kunsmisbedryf wat perfek inpas by Groupe Roullier se navorsing en ontwikkeling. Nou kan Profert, as deel van die Timac-familie, ’n groter reeks produkte aan die boer bied as ooit tevore. Dit sal spesiaal geformuleer wees vir sy tipe boerdery, weerstoestande en grondtipes en, soos altyd, op plaaslike markbehoeftes toegespits wees.
GOEIE GEHALTE
Iets wat nie gaan verander nie, is die gehalte van die produkte. Volhoubare en omgewingsvriendelike landboupraktyke en -produkte bly die hoeksteen van die maatskappy. Die beskerming van natuurlike habitatte is noodsaaklik, daarom werk Profert saam met die natuur, nie daarteen nie. Soos in die natuur sal die simbiose albei entiteite sterker maak. Boere moet florerende boerderye kan bedryf en daarom is die opbrengs op hul beleggings uiters belangrik.
Profert het baie sukses met sy reeks BlackTM-produkte. Die BlackTM-reeks is hoofsaaklik Urea en DAP, wat gedek is met LaunchTM. Dit verbeter die doeltreffendheid van kunsmis.
Dié produkte is onder meer deel van die maatskappy se strategie vir verbeterde tegnologie. Dit is een van vele redes waarom Timac Agro belangstelling in Profert getoon het.
Die landbouformules van Timac Agro se unieke enkelkorrelkunsmisproduk is akkuraat saamgestel om ’n toegespitste uitwerking te hê. Dit sal ook die gehalte van die oes verbeter en nie net die opbrengs nie.
MEER OPSIES
Timac Agro se aankoop van Profert vorm deel van ’n ontwikkelingsplan wat aansienlik meer keuses ten opsigte van plant- en diervoeding aan die Suid-Afrikaanse boer beskikbaar sal kan stel.
“Ek is baie opgewonde oor dié geleentheid en ek glo saam sal ons meer vernuwende oplossings vir ons boere se daaglikse praktyke kan bied,” het mnr. Olivier Duval, uitvoerende direkteur van Timac Agro, met die aankondiging van die oorname gesê. Timac Agro sal dus baat vind by Profert se enorme kennis en ervaring van bemesting en kunsmisverspreiding in Suid- Afrika.