Teepartytjie in die tuin

Oktober is die mooiste maand. Dek ’n mooi tafel in die tuin en nooi jou vriendinne vir koek en tee om die lente te vier.

Karringmelk-sjokoladekoek met roos-enroomkaasversiersel

Dit is alles wat ’n sjokoladekoek moet wees – klam, donker, bittersoet en propvol sjokoladegeur. Ek verkies om die koek met roomkaasversiersel te versier, juis omdat dit ook nie uitermatig soet is nie en die geur van die sjokoladekoek komplementeer. Maar jy kan botterversiersel, karamelkondensmelk of ganache ook gebruik.

Beslag

430 ml koekmeel 375 ml strooisuiker 180 ml kakao, gesif 5 ml koeksoda 5 ml bakpoeier 2 ml sout 2 ekstragroot eiers 250 ml karringmelk of maas 125 ml gesmelte botter 10 ml vanieljegeursel 250 ml sterk, warm koffie

Roos-en-roomkaasversiersel

150 g botter 500 ml versiersuiker 1 houer (200 g) volvet-roomkaas 30 ml vars suurlemoensap 10 ml vanieljegeursel 3 ml rooswater Roosstroop of ’n paar druppels rooi koekkleursel

Vars somerbessies, om af te rond

Voorverhit die oond tot 180 °C en smeer twee panne van 20 cm met olie of spuit met kleefwerende kossproei.

Beslag: Meng die koekmeel, strooisuiker, kakao, koeksoda, bakpoeier en sout saam in ’n groot mengbak. Klits die eiers, karringmelk of maas, gesmelte botter en vanieljegeursel saam. Voeg die warm koffie in ’n dun straaltjie by terwyl geklits word. Voeg die koffiemengsel by die droë bestanddele en meng goed (dit sal ’n dun beslag wees). Verdeel die beslag tussen die panne en bak vir 30-35 minute tot deurgaar en ’n toetspen skoon uit die hoogste deel van die koeke kom. Laat die koeke vir 10 minute in die panne afkoel en keer dit dan op draadrakke uit om af te koel tot kamertemperatuur. Versiersel: Verroom die botter en versiersuiker goed saam. Voeg die roomkaas, suurlemoensap, vanieljegeursel en rooswater by en klits tot glad en romerig. Voeg roosstroop of koekkleursel by en klits deur. Verkoel vir ongeveer 30 minute, tot ferm. Versier die koek met die roomkaasversiersel en versier met somerbessies. Lewer ongeveer 16 porsies.

Gemmer-en-peerroomtert

Hierdie sagte yskastert is heerlik dekadent. Die vulsel is redelik sag. Sorg dus dat die pere baie goed gedreineer is voor dit op die karamel gepak word en hou die tert in die yskas tot net voor dit voorgesit moet word.

Kors

1 pakkie (200 g) gemmerkoekies, fyn gekrummel 100 ml botter, gesmelt 15 ml goue- of esdoringstroop

Vulsel

1 blik (380 g) karamelkondensmelk 1 blik (410 g) peerhalwes 250 ml pekanneute, gekap 60 ml ingelegde gemmer, fyn gekap 250 ml room 30 ml vanieljegeur kitspoedingpoeier

Skep ongeveer 45 ml koekiekrummels uit en hou eenkant. Meng die res van die

koekiekrummels, botter en stroop goed saam. Druk dit op die bodem en halfpad teen die kante van ’n losboomkoekpan van 25 cm vas. Verkoel vir 10 minute.

Skep 30 ml van die karamelkondensmelk uit en hou eenkant. Klits die orige karamelkondensmelk tot glad en smeer oor die beskuitjiekors. Verkoel weer vir 10 minute. Dreineer intussen die peerhalwes goed en sny in dun skyfies. Druk die peerskyfies goed droog met kombuispapier. Rangskik die peerskyfies op die karamellaag en sprinkel die gekapte neute en gemmerstukkies oor. Klits die room, kitspoedingpoeier en die 30 ml karamelkondensmelk saam tot styf en smeer oor die tert. Verkoel tot benodig. Sprinkel ekstra gekapte neute en die orige gemmerkoekiekrummels oor. Verkoel tot benodig. Lewer 1 middelslagtert.

Volgraan-kaas-enbiltongbotterbroodjies

’n Teepartytjie is nie volledig sonder botterbroodjies van die een of ander aard op die tafel nie. Hierdie soutweergawe smaak heerlik as jy dit louwarm voorsit met botter en gerasperde kaas of met geurige roomkaas om op te smeer.

600 ml volgraanmeel 15 ml bakpoeier 5 ml koeksoda 5 ml sout 100 g koue botter, in blokkies gesny of grof gerasper 375 ml gerasperde cheddarkaas 125 ml fyn biltong Ongeveer 330 ml karringmelk of suurmelk

1 eier, geklits met 30 ml melk 100 ml fyngekrummelde fetakaas, om oor te sprinkel

Voorverhit die oond tot 220 °C en voer ’n bakplaat uit met bakpapier. Meng die meel, bakpoeier, koeksoda en sout saam en vryf die botter daarby in tot die mengsel soos growwe krummels lyk.

Roer die kaas en biltong by. Voeg die helfte van die karring- of suurmelk by en sny dit by die droë bestanddele in, terwyl jy nog van die melk bietjie vir bietjie byvoeg tot ’n deeg vorm. Druk die deeg bymekaar en rol dit op ’n meelbestrooide oppervlak uit tot ongeveer 3 cm dik. Druk botterbroodjies uit en pak op die bakplaat. Verf elke botterbroodjie bo-op met die eier-en-melkmengsel en sprinkel ’n bietjie gekrummelde fetakaas bo-op elk. Bak vir 12-15 minute tot goudbruin en deurgaar. Lewer ongeveer 16 botterbroodjies.

Vlatertjies met kaneelheuning

Hierdie heerlike tertjies herinner aan Portugese vlatertjies (Pasteis de Nata), maar die soet lagie kaneelheuning bo-op gee ’n heel nuwe geur daaraan. Ek het vlak muffinpannetjies vir dié tertjies gebruik. As jy net standaardgrootte pannetjies het, bak die tertjies dan vir ten minste 5-7 minute langer. Jy sal dan ongeveer 12-14 tertjies uit dié resep kry.

2 rolle (300 g elk) reg-om-te-gebruik skilferkorsdeeg Vulsel

250 ml suiker 30 ml meel 500 ml room 125 ml melk 6 eiergele 1 heel eier Knippie sout 3 ml amandelgeursel Kaneelheuning 125 ml heuning 5 ml fyn kaneel

Rol die deeg uit op ’n koue, meelbestrooide oppervlak. Druk 12 sirkels (ongeveer 10 cm in deursnee) uit elke rol deeg en voer die holtes van twee gesmeerde, vlak muffinpanne daarmee uit. Verkoel tot benodig. Vlavulsel: Klits die suiker, meel, room, melk, eiergele, eier en sout saam in ’n kastrol. Verhit oor baie lae hitte, terwyl aanhoudend geroer word, tot die vla verdik en net begin kook. Verwyder van die hitte en roer die geursel by. Sit die pot in ’n bak met yswater om die vla vinniger te laat afkoel en roer gereeld om dit glad te hou.

Voorverhit intussen die oond tot 220 °C. Maak elke skilferdeeg-tertkors ongeveer driekwart vol vlavulsel. Bak vir ongeveer 10 minute (die tertjies sal bruin raak bo-op). Haal uit die oond en laat afkoel tot kamertemperatuur. (Moenie skrik as die vulsel nog effens loperig lyk nie, dit sal ferm word namate die tertjies afkoel.) Verhit die heuning en kaneel in ’n pan tot kookpunt. Kook vir ’n minuut of twee tot ’n karamelkleurige stroop. Verwyder van die hitte en drup ’n teelepel vol oor elke tertjie. Laat afkoel. Verkoel tot benodig. Lewer 22-24 tertjies.

Appelliefie-vlatert

Jy kan hierdie lekker tert met enige bessiekonfyt maak. Aangesien appelliefies se seisoen vir vars vruggies redelik kort is, maar appelliefiekonfyt geredelik beskikbaar is, het ek besluit om eerder ’n resep met konfyt te ontwikkel. Die tert is romerig en nie oormatig soet nie. Heerlik vir ’n lente-tee.

250g broskorsdeeg Vulsel 2 ekstragroot eiers 2 eiergele

250 ml room 5 ml vanieljegeursel 250 ml appelliefiekonfyt

Versiersuiker, om oor te sif

Voorverhit die oond tot 200 °C en spuit ’n losboomtertpan van 23 cm met kleefwerende kossproei. Rol die deeg op ’n meelbestrooide oppervlak uit en voer die pan daarmee uit. Prik die boom van die deeg met ’n vurk en voer uit met bakpapier. Vul die papier met droëbone of rys en bak dit blind vir 10 minute. Haal die pan uit die oond, verwyder die papier met bone of rys en sit die pan terug in die oond. Bak die deeg vir ’n verdere 5 minute of tot dit nie meer klam is nie. Verlaag die oondtemperatuur tot 170 °C.

Terwyl die deeg bak, klits die eiers, eiergele, room, vanieljegeursel en konfyt saam tot goed gemeng. Giet die vulsel versigtig in die deegdop en sit die tert weer in die oond. Bak vir 35-45 minute, of tot ferm. Haal uit die oond en laat die tert in die pan afkoel tot kamertemperatuur.

Verkoel tot benodig, maar sit voor teen kamertemperatuur. Sif versiersuiker oor net voor die tert bedien word. Lewer 14 porsies.