Wêreld eet ál meer hoender
Die wêreldvraag na hoendervleis het die afgelope 20 jaar met 91% gegroei. Dit is gemiddeld 3,5% per jaar, sê mnr. Jim Sumner, voorsitter van die Amerikaanse raad vir die uitvoer van hoendervleis en eiers (USAPEEC).
Hy het op besoek aan Suid-Afrika aan joernaliste gesê die vraag gaan na verwagting in die volgende tien jaar met 30% groei. Dit is danksy bevolkingsgroei, asook die verbruik per kop van hoendervleis.
Veral danksy verbruik in China is varkvleis tans die soort vleis waarvan wêreldwyd die meeste geëet word, maar Sumner sê hoendervleis kan varkvleis tussen 2020 en 2030 verbysteek.
Die wêreld se grootste braaihoender produsente is, in volgorde, Amerika, Brasilië, China en die Europese Unie (EU). Die grootste uitvoerders van hoendervleis is Brasilië, Amerika en die EU.
Brasilië en Amerika is verantwoordelik vir sowat twee derdes van die wêreld se braaihoender-uitvoer.
Amerika het verlede jaar en tot dusver vanjaar sowat 17% van sy produksie uitgevoer.
Die grootste invoerders van hoendervleis is Japan, Hongkong, Mexiko, China, SuidAfrika en die EU.
Amerikaners eet die meeste hoendervleis per jaar, naamlik 46,8 kg per persoon, waarna Argentyne, Brasiliane, SuidAfrikaners en Mexikane volg.
Suid-Afrikaners eet gemiddeld 33 kg hoendervleis per persoon per jaar.