Terug na die heimat
Vanjaar se Opkomende Teler van die Jaar raak nie net oor boerdery opgewonde nie. Hy dien ook in verskeie direksies.
Mnr. Nkomsentu Nika van Tarkastad is vanjaar se Pick n Pay en Rudd Products se Opkomende Teler van die Jaar. Hy het op ’n plaas in die distrik grootgeword. Nadat hy in 1981 die graad B.Com. aan die Universiteit van Fort Hare verwerf het, het hy in Johannesburg, Umtata en Londen gewerk. Met sy terugkeer na Suid-Afrika het Nkomsentu ’n finansiële direkteur van Petro SA geword.
Toe het hy teruggekeer na waar hy grootgeword het en die plaas Fairfields van 1 982 ha by Tarkastad gekoop. Die plaas het ’n drakrag van 7 ha per grootvee-eenheid en het 14 ha onder besproeiing, terwyl hy ook 11 ha aartappels aanplant.
BRANGUS
Nkomsentu besit ’n Brangusstoetery en kommersiële koeie.
Sy dektyd vir verse begin op 15 November. Van 1 Desember loop die koeie by die bulle tot die dektyd einde Februarie eindig. Hy gebruik bulle van dr. Morné Verster en mnr. Barry King, wat as mentors vir hom optree.
Hy konsentreer op hoogs vrugbare, vroulike koeie en lang bulle. Gevolglik het sy kudde ’n tussenkalfperiode van minder as 400 dae. Prestasietoetsing word in die kudde gedoen.
Kalwers word op ses maande gespeen. Verlede jaar was die gemiddelde speengewig van bulkalwers 220 kg en verskalwers het gemiddeld 180 kg geweeg.
Wanneer hy vervangingsverse selekteer, word diere verkoop wat nie aan die rasstandaarde voldoen nie. Die verse wat agterbly, word in die berge groot, waar hulle net ’n basiese proteïenlek in die winter en ’n fosfaatlek in die somer kry. Hulle word op twee jaar gedek. Die dragtigheidsyfer beloop meer as 90%.
Hy gaan volgende jaar twee bulle op Barry se produksieveiling aanbied.