’N FEES VAN VYE
Jaco en Liezl de Klerk van Weltevrede naby Prince Albert in die Klein-Karoo boer met vye. Die wonderlikste vye-skeppings kom uit Liezl se kombuis.
Jaco en Liezl is die sesde geslag wat op Weltevrede boer. “Dis ’n groot voorreg om op ’n plaas te bly met so ’n ryk familiegeskiedenis. Ons kinders kry die geleentheid om ’n sterk band met hul ouma en oupa te vorm. Ek het dieselfde met my grootouers gehad,” gesels Liezl.
“Vyeboerdery het ’n lang seisoen. Mense is altyd verbaas as hulle dit hoor,” se Jaco. “Ons seisoen begin in September met groenvye (voorvye), en dan ons ander vye tot in Mei. In die winter fokus ons op uitbreidings, snoei ’n bietjie en maak gereed vir oestyd, want as ons oes, is daar min tyd vir enigiets anders.”
Prince Albert is ’n dorp met ’n sterk koskultuur en daar is heelwat uitstekende kokke. Mense ry van ver vir Weltevrede se vyeprodukte en vriende kan nie uitgepraat raak oor Liezl se heerlike kos nie.
Benewens vars vye word vye ook al vir geslagte op Weltevrede gekook. Konfyt is die derde been van die besigheid.
Dit is onder Liezl se bekwame hand tot ’n hele deli-reeks van vyeprodukte uitgebrei. Aanvanklik het alles in die kombuis gebeur, later het hulle nog ’n vertrek aangebou en twee jaar terug het hulle ’n volwaardige konfytfabriek naby die huis aangebou. Só is dit vir Liezl (wat ook twee klein kindertjies het) maklik om ’n oog oor die proses te hou.