SÓ HANTEER JY ONWETTIGE GRONDBESETTINGS
Afriforum het vroeër vanjaar ’n blitsgids saamgestel met wenke oor hoe om dié struikelblok te oorkom. Raak dadelik betrokke by jou plaaslike veiligheidstruktuur of buurtwag. Wees paraat en bewus van alles wat op jou grond aangaan. Patrolleer die area en versoek jou buurtwag of veiligheidsmaatskappy om hul oë oop te hou vir nuwe of vreemde strukture. Indien daar wél werkers of besetters op jou grond woon, bekom soveel inligting as moontlik oor hulle (byvoorbeeld naamlyste en afskrifte van ID’s) sodat mense wat nie daar hoort nie, maklik geïdentifiseer kan word. Pas streng toegangsbeheer toe. Moenie toelaat dat vreemdelinge jou grond as ’n deurpad gebruik nie. Bou ’n goeie verhouding met die plaaslike polisie en skakel in by jou plaaslike buurtwagstruktuur of die gemeenskapspolisiëringsforum (GPF). Indien jy tydelik nie op die grond kan wees nie, reël alternatiewe toesig. Moenie verkondig dat jy vir ’n bepaalde tyd uithuisig gaan wees nie. Hou aantekeninge by van alle onbekende persone en voertuie in die omgewing en neem foto’s waar moontlik. Meld ook die datum, tyd en plek aan waar die persone of voertuie opgemerk is, en stel jou buurtwag of veiligheidsmaatskappy daarvan in kennis. Dien klagtes kragtens die Wet op Oortreding (Wet 6 van 1959) by die polisie in teen alle onregmatige betreders. Maak seker jy kry ’n bewys van ontvangs met die beampte se rang, naam, van en masnommer as jy die verklaring indien.