MNR. BERNARD RABÉ
WIE IS JOU MENTOR?
Ek het maar grootgeword op die plaas, en ek, my pa en my broer het tien jaar lank saamgeboer. Wat boerdery betref, kom dit hoofsaaklik van my pa af. Hy werk baie presies. Tot waar ons as familie gekom het, is dit deur sy werk en sy presieswerk, veral op syfers en papierwerk.
WAT IS JOU BESTE BOERDERYBESLUIT NOG?
Een van die beste langtermynbesluite was om werklik die beskikbare tegnologie te gebruik tot voordeel van die boerdery. Tegnologie kan jou ook aftrek en jy kan baie betaal vir tegnologie wat vir jou niks beteken nie. Daarom het ek ’n doelbewuste besluit gemaak om te belê in tegnologie wat tot die beste voordeel van my boerdery is.
EN WATTER BOERDERYFOUTE HET JY BEGAAN?
Om alles vir almal te probeer wees. Jy gaan moet besluit waarop jy jouself wil toespits, hetsy dit mielies, ’n voerkraal, hoenders of enige ander tipe boerdery is. Jy moet iewers besluit: Waar pas jy in? My grootste fout was om in hoenders te belê. Ek kon uiteindelik nie genoeg aandag aan al die vertakkings gee nie, en ons moes die hoenderboerdery laat vaar.