EINDE VAN HOË PRYSE
In die Augustus-uitgawe van die tydskrif Eurofruit is berig dat die goeie jare vir suurlemoene waarskynlik tot ’n einde gekom het. Luidens die tydskrif lê moeilike tye vir dié segment van die sitrusbedryf voor. Die rede is nie dat verbruikers hul rug op suurlemoene gekeer het nie, maar ’n wêreldwye oorproduksie daarvan.
Die suurlemoengroep van die Suider-Afrikaanse Sitruskwekersvereniging het sy uitvoerskatting vir die pas afgelope produksiejaar van 17,5 miljoen kartonhouers opwaarts aangepas tot 19 miljoen kartonhouers. Dit plaas verdere druk op die bedryf plaas.
Verlede jaar is byna R10 000 per ton vir suurlemoene betaal. Die vraag uit China was só groot dat houers vol vrugte per lugvrag daarheen uitgevoer is. Met die aanplanting van nuwe boorde, veral sedert 2010, in Suid-Afrika (die opbrengs beloop tot 90 t/ha), Argentinië en Spanje was dit teen einde verlede jaar duidelik dat die mark die gevaar staan om met suurlemoene oorstroom te word en pryse kan halveer.
Mnr. Hannes de Waal, besturende direkteur van die Sondagsrivier-sitrusmaatskappy (SRCC), het potensiële toetreders versoek om nie op die wa te klim nie. “Spaar eerder jul geld en belê in alternatiewe gewasse, want as julle dit nie doen nie, sal julle diep sakke moet hê om ’n lang uitskudtyd te oorleef.” Hy sê hoewel lemmetjies as alternatief vir suurlemoene gesien word, is groot aanplantings reeds in Mexiko gedoen om in die wêreldvraag daarna te voorsien.