Skade in Wes-Kaap sal R1 miljard oorskry
PRODUKSIEVERLIESE in die Wes-Kaap weens die uitbreking van die hoogs aansteeklike H5N8-pluimveevirus beloop reeds meer as R800 miljoen, en dit sal waarskynlik jare kos om van die langtermyngevolge te herstel.
Meer as 2 miljoen hoenders moes van kant gemaak en eiers vernietig word in ’n poging om die verdere verspreiding van die virus te bekamp.
Daar was altesaam 36 uitbrekings in die provinsie en 70 volstruisplase is ook onder kwarantyn geplaas, met die jongste geval teen druktyd by World of Birds in Houtbaai, met 2 500 voëls, waar ’n hoender positief vir die virus getoets het. Mnr. Alan Winde, Wes-Kaapse minister van landbou, het gesê dié provinsie is die swaarste getref deur die uitbreking omdat dit die Wes-Kaap in die Paardeberg-gebied getref het, wat die hoogste konsentrasie hoenderplase het.
Daar was ook reeds uitbrekings van die virus in Mpumalanga, die
Oos-Kaap, Gauteng, KwaZuluNatal en Noordwes.
VERGOEDING
Die Departement van Landbou, Bosbou en Visserye praat nog met belanghebbendes in die bedryf om te bepaal hoe om die verdere verspreiding te bekamp. Die hoenderbedryf het die departement reeds genader oor die moontlikheid van inenting.
Teen druktyd het die departement nog nie riglyne bekend gemaak oor vergoeding aan produsente wat gesonde voëls van kant moes maak nie.
Wes-Kaapse landbou-ekonome het begin om die moontlike ekonomiese skade van die virus te bereken. Hulle meen konserwatief
bereken was die geraamde verlies aan hoenders en eiers ongeveer R800 miljoen. Arbeidskoste en materiaal vir komposproduksie is nog nie eens bygetel nie.
Mnr. Louw Pienaar, senior landbou-ekonoom by die Wes-Kaapse departement van landbou, sê die algehele ekonomiese impak sal baie meer beduidend wees omdat baie van die plase hul inkomste op die lange duur sal verloor weens die kwarantyn beperkinge wat ingestel is. Daar word verwag dat die prys van eiers op kort termyn matig sal styg tot sowat R20 per dosyn. Die 900 000 huishoudings in die provinsie wat op eiers as basiese proteïen staatmaak, sal die ergste getref word.