Bolwurmterugslag vir Swartland
GRAAN SA het ’n versoek tot die registrateur verantwoordelik vir die registrasie van onder meer gifstowwe (Wet 36 van 1947) gerig vir die noodregistrasie van nuwe middels teen Afrika-bolwurm.
Ditvolgnádiedroogtegeknelde koringboere in die Swartland nou ook deur ’n erge plaag van dié wurm getref is.
Volgens mnr. André Kirsten, boer van Philadelphia, het boere by Porterville, Klipheuwel en Darling reeds teen die wurm gespuit, maar hulle sukkel om middels te kry wat die volwasse wurms kan doodmaak, en verder is die oes reeds uiters swak.
“Talle boere besluit nog of dit die moeite werd is om verder geld te bestee op iets wat reeds ’n verlies is,” sê hy.
“Ons het vanjaar nou al genoeg pak slae gekry om nou nog dít ook te kry.”
Hy weet egter nie of die noodregistrasie betyds afgehandel gaan wees nie, want met die huidige hitte gaan baie van die graan binne ’n week te ryp wees.
TREURIG
Die Swartland het die afgelope winter skaars ’n derde van sy gemiddelde langtermyn-reënval gekry en oesverwagtinge is nie goed nie. Boere by Malmesbury en Moorreesburg gaan oes, maar noord van Moorreesburg daal die vooruitsigte drasties. Talle boere daar gaan nie hul stropers uit die skuur trek nie.
Mnr. Thys Grobbelaar van die plaas Koringkloof by Eendekuil sê dis nie die moeite werd om te oes nie, want hulle gaan nie eens die koste van hul saad verhaal nie. Hulle het reeds skape op graanlande begin jaag, maar besef hulle moet die lande oordeelkundig benut omdat ’n lang somer voorlê.
Hulle het vanjaar net een keer reën van meer as 10 mm gehad en die totaal vir die jaar is nog nie 100 mm nie. Hy sê talle boere in sy omgewing gaan nie oes nie.
Mnr. Cobus Bester van die UD-boerdery by Moorreesburg sê hulle verwag skaars die helfte van wat hulle in ’n normale jaar sou oes. “Noord van Moorreesburg is die verwagtinge selfs minder.”
Hy sê die 150 mm reën wat hulle die afgelope winter gekry het, is minder as ’n derde van hul gemiddelde reënval op lang termyn.
“Dit is onmoontlik om ’n winsgewende graanboerdery met so min reën te bedryf.” Tog sê hy dat bewaringsboerdery help dat daar meer op die lande staan as wat die geval daarsonder sou wees.
Die Oesskattingskomitee se jongste skatting raam vanjaar se koringoes op 1,716 miljoen ton, sowat 7% hoër as die skatting in Augustus, maar 193 350 ton (10%) minder as in 2016.