BOERE MOET KYK NA HULSELF ÉN MEKAAR
DIE ergste droogte in menseheugenis wat in die drie Kaapprovinsies heers, knaag aan boere se gemoedere.
Dit kan daartoe lei dat boere wat nie ’n ander uitweg sien in dié tyd van uitermate stres oor reën wat nie kom nie en rekeninge wat betaal moet word, hul eie lewe neem, sê mnr. Henk van Wyk, voorsitter van Agri Noord-Kaap.
Van Wyk het op Agri Namakwaland se onlangse jaarlikse kongres op O’Kiep gesê die georganiseerde landbou onderhandel met die Regering en beraam allerhande ander planne vir boerderye, maar emosionele faktore word feitlik nooit bekyk nie. “Wanneer sulke demoraliserende toestande heers, is dit ’n wêreldwye verskynsel dat meer boere hul eie lewe neem.
“Geleerdes sê die oorsaak daarvan is dat boere geneig is om te selfvoorsienend en te onafhanklik te wil wees. Hulle kry nie hulp en berading wanneer hulle moet nie.
“Ons vat ons bakkies gereeld om versien te word om hul lewe te verleng en werking te verbeter,
maar wat doen ons vir onsself? Kry ons berading?”
WERKVERSKAFFER
Hy reken boere het ’n wyer verpligting om na mekaar te kyk. Hy sê verder daar moet reg oor die land groter bewusmaking geskied oor die sombere uitdagings wat boere van die ou Kaapprovinsie ervaar. “Van Calvinia tot by Somerset-Oos is die wêreld kaal. Die Regering sal daarvan bewus gemaak moet word dat wanneer die boeregemeenskap sukkel, plattelandse gemeenskappe ook swaarkry, veral omdat die landbou feitlik die enigste verskaffer van werk in dié ekonomieë is.”