LANDBOUNUUS UIT AFRIKA

1 UGANDA | Koffieprojek werp vrugte af

Uganda het in die afgelope bemarkingsjaar tot 30 September 18% meer koffie uitgevoer as in die vorige jaar. Dit was danksy nuwe aanplantings wat in produksie gekom het. Die land het 4,2 miljoen sakke van 60 kg elk uitgevoer — die meeste sedert 1996. Die land se inkomste uit koffie het met 40% gestyg vanaf $351 miljoen (R4,91 miljard) tot $490 miljoen (R6,9 miljard).

Die Ugandese koffie-ontwikkelingsowerheid (UCDA) het sedert 2012 bykans 317 000 koffiesaailinge aan boere in die 98 koffieproduserende distrikte versprei, maar lae produktiwiteit, onvoorspelbare weer, onvoldoende tegniese steun en lae kunsmisverbruik strem steeds produksie.

Die UCDA is tans besig om alle koffieboere te registreer, en ’n nuwe konsepwet oor die koffiebedryf word binnekort in die land se parlement bespreek.

Die land se regering wil produksie opstoot tot 20 miljoen sakke koffie per jaar. – Independent (Uganda)

2 GHANA en 3 IVOORKUS | Onregverdige kakaopryse moet einde kry

Die buurlande Ghana en die Ivoorkus wil saamwerk om die ongunstige internasionale prysreëlings vir kakao aan te pak.

Mnr. Nana Addo Dankwa Akufo-Addo, president van Ghana, sê dit is ’n “skreiende onreg” dat dié twee lande in die 2015-oesjaar ’n skamele $5,75 miljoen (R81,5 miljoen) verdien het vir hul gesamentlik kakao-oes, wat 65% van die wêreld se kakaoproduksie verteenwoordig. Op daardie tydstip was die wêreldmark nagenoeg $100 miljard (R1 417 miljard) sterk. – All Africa