INTERNASIONALE LANDBOUNUUS
1 AMERIKA | Soja verloor ’n regmerkie
Die invloedryke Amerikaanse agentskap vir voedsel en medisyne (FDA) oorweeg dit om die aanspraak dat sojaproteïene die risiko van hartsiektes te verminder, terug te trek. Dis die eerste keer dat die FDA só ’n stap oorweeg oor ’n kos-aanbeveling.
Dr. Susan Mayne, direkteur van die sentrum vir kosveiligheid en toegepaste voeding by die FDA, sê die 709 studies wat in 1999 gebruik is om die aanvanklike gunstige beslissing te motiveer, sowel as studies wat sedertdien gepubliseer is, is hersien.
“Hoewel sommige navorsing steeds op ’n verband tussen sojaproteïene en ’n verminderde risiko van hartsiektes dui, skep die totaliteit van die wetenskaplike bewyse wat tans beskikbaar is, twyfel oor die sekerheid van dié verband.” – Food Business News
2 ITALIË | Gevreesde voëlgriep slaan toe
Die hoogs aansteeklike H5N8-voëlgriepvirus wat sedert Julie honderde miljoene rand se skade in Suid-Afrika aangerig het, het in Milaan, Italië, kop uitgesteek en daartoe gelei dat die Hongkongse voedselveiligheidsowerheid alle invoer van pluimveevleis en -produkte, insluitend eiers, uit Italië opgeskort het. Italië het vanaf Januarie tot September nagenoeg 1 300 ton bevrore hoendervleis en 12 000 eiers na Hongkong uitgevoer. – Xinhua
3 AUSTRALIË | Vleisverbod (vir eers) verby
Die Chinese regering het sy verbod op rooivleisinvoer vanaf ses Australiese abattoirs opgeskort. Die verbod is op 25 Julie onverwags ingestel. Die redes vir dié stap was onduidelik, hoewel dit blykbaar te doen gehad het met etikettering en nie met dieregesondheidskwessies nie. Die ses maatskappye saam verteenwoordig nagenoeg 30% van Australië se rooivleisuitvoer na China. Bedryfslede waarsku dat Australië met China moet onderhandel oor ordelike uitvoerprosesse wat Australiese belange beskerm – Beef Central
4 INDIË | Nuwe wet moet plaaswerkers help
Nagenoeg 62 000 ongedokumenteerde plaaswerkers gaan binnekort besitreg kry vir die huise waarin hulle woon. Hulle het voorheen nie in aanmerking gekom vir sulke regte nie omdat die grond waarop hul huise staan, nie aan hulle behoort het nie. Dié maatreël is van krag vir plaaswerkers wat voor 1979 in sulke huise gewoon het en volg ná ‘n hersiening van wetgewing oor grondhervorming.
Die projek gaan aanvanklik net in die deelstaat Karnataka in werking gestel word, maar die buurdeelstate Andhra Pradesj, Telangana en Uttar Pradesj oorweeg dit om in ’n later stadium dieselfde te doen.
Die geraakte plaaswerkers moet by die regering registreer as eienaars van die huis, waarna die regering sal begin om infrastruktuur, soos paaie, openbare vervoer en drinkwater, aan te lê. – Times of India