Ondernemings wêreldwyd ondersteun Swart Maandag
Outdoor Investment Holdings en sy internasionale vennote het hul gewig ingegooi agter die Swart Maandag-veldtog wat op 30 Oktober stemme teen plaasmoorde laat opgaan het.
Suid-Afrika beleef ’n moeilike tyd, sê mnr. Marco van Niekerk, hoof- uitvoerende beampte van Outdoor Investment Holdings (Edms.) Bpk. “Mense weet nie hoe om op te tree nie. Almal weet egter iets moet gedoen word. Die Swart Maandag-beweging was ’n begin, al was dit net om bewustheid te skep. Ons samelewing, die man op straat, is desperaat.”
Marco sê die veldtog het ongelukkig ook gewys hoe verdeeld Suid-Afrikaners is. “Tydens en ná die byeenkomste was dit duidelik hoe selfs ’n protesoptrede teen moord deur faksies en politieke partye misbruik word. Misdaadstatistieke verander elke minuut, na gelang van die gehoor en agenda, en ons moet self probeer uitvind wat die waarheid is.”
Die getal boere wat vermoor en gemartel word, het afmetings aangeneem wat selfs Suid-Afrika se verdeelde samelewing om solidariteit laat uitroep, sê hy.
Outdoor Investment Holdings (Edms.) Bpk. (die houermaatskappy van Safari Outdoor, Formalito, Inyathi Sporting Supplies en Safari Outfitters) neem nie ’n politieke of kulturele standpunt in nie, maar sal sy gekombineerde gewig ingooi agter enige wettige inisiatief wat plaasaanvalle probeer stuit.
“Behalwe vir ons besighede se personeel wat solidariteit met ons plaaseienaars en -werkers betoon het deur swart klere te dra, het ons ook wêreldwyd na ons vriende uitgereik om hul steun te voeg by ons toenemende desperaatheid. Die spanne van Leupold & Stevens, Hornady en talle ander het aan ons oproep gehoor gegee en ook swart gedra.
Die Hornady-span in Amerika staan trots saam met Suid-Afrikaanse boere en hul gesinne.
“Swart of wit, manlik of vroulik, niemand moet die slagoffer van geweldsmisdaad wees nie.”
Die Leupold-span in Amerika het hierby aangesluit.
“Ons gedagtes en gebede is by die boere, werkers en gesinne wat ly weens geweldsmisdaad in Suid-Afrika.”