Nuut opdierak!

MONITOR

HOU ’N WAKENDE OOG OP WERKSPANNE Om werkspanne van ’n sentrale punt af op afgeleë plekke te monitor is nie so maklik nie, veral nie wanneer jy op selfoonnetwerke moet staatmaak om vir jou beeldmateriaal te stuur nie.

Gevolglik het Qubi Systems van Modimolle in Limpopo die QUBIcam ontwikkel. Dié kamera neem elke 15 minute ’n foto en stuur dit na ’n sentrale bediener van Qubi Systems. Die eienaar kan te eniger tyd aanmeld en kyk na wat die kamera op ’n bepaalde tydstip afgeneem het.

Mnr. Willie Cloete van Qubi Systems sê een van sy kliënte gebruik die stelsel om te kyk hoe sy werkspanne vorder met die installering van spilpunte. Die kamera gaan dus bedags saam na die werksterrein toe. “My kliënt kan sien hoe vinnig of stadig sy spanne werk en of hulle die regte stappe en veiligheidsprosedures volg.” Die kamera kan by selfoonnetwerke inskakel of aan Wi-Fi-netwerke gekoppel word en só data stuur. Waar daar nie netwerkdekking is nie, kan dit tot 3 500 foto’s bêre en dit dan stuur wanneer daar weer ’n dataverbinding is. Die QUBIcam kan vir vyf dae werk voor die battery gelaai moet word. Aangesien dit nie foto’s na ’n selfoon of e-posadres stuur nie, veroorsaak dit nie ’n opeenhoping van data op die gebruiker se toestel nie. PRYS: R5 586. NAVRAE: Mnr. Willie Cloete, sel 082 561 3373.