Nuwe opgietmiddel troef dié parasiete
’n Nuwe opgietmiddel vir die bestryding van bloubosluise, horingvlieë en rondewurms by beeste is nou by MSD Animal Health beskikbaar, skryf dr. Tom Strydom, internasionale tegniese direkteur vir teenparasitiese middels by MSD Animal Health.
Vleisbeesboere kan uitsien na beter bestryding van bloubosluise (Rhipicephalus [Boophilus] spp.) en rondewurms by vleisbeeste in Suid-Afrika. Dié opgietmiddel, Avotan® Plus Pour-On (reg.nr. G4216, Wet 36 van 1947), se formulasie bestaan uit ’n kombinasie van fluasuron en abamektien en het ’n na-werkende effek van 42 dae vir die bestryding van bloubosluise.
Die unieke kombinasie van abamektien en fluasuron in Avotan® Plus Pour-On maak die produk ’n uitstekende hulpmiddel vir die beesboer wat bloubosluise én rondewurms wil bestry.
STREM GROEI
Fluasuron behoort tot ’n groep chemiese middels wat bosluisgroeireguleerders genoem word. Hierdie middels veroorsaak nie regstreeks dat bosluise vrek nie, maar meng in met die groei en ontwikkeling van die parasiete.
Bosluisgroeireguleerders se werking is hoofsaaklik op die onvolwasse stadiums van die parasiete gemik. As sodanig is dit dus nie geskik vir die vinnige bestryding van gevestigde volwasse bosluisbevolkings nie.
Fluasuron onderdruk die sintese van chitien, die primêre komponent van die eksoskelet van bosluise en ander insekte, tydens die vervellingsproses van die bosluis.
Die uitwerking van fluasuron op volwasse bosluise is dus ’n afname in die fekunditeit en vrugbaarheid van wyfiebosluise.
Die aktiewe bestanddeel word gedeeltelik in die melk van lakterende koeie uitgeskei. Kalwers wat steeds aan hul moeders suip, kry sodoende genoeg fluasuron in om hulle teen bosluise te beskerm en benodig nie bykomende behandeling nie.
Abamektien is ’n avermektien wat tot die makrosikliese laktoongroep van middels behoort. Makrosikliese laktone is breëspektrum- antiparasitiese middels wat doeltreffend is teen inwendige en uitwendige parasiete. Hierdie groep middels bestry bosluise in alle stadiums van hul lewensiklus, maar is vanweë hul sistemiese werking net geskik vir die bestryding van bloubosluise. Die groep middels is ook doeltreffend met die bestryding van rondewurms by herkouers.
PLAASLIK GETOETS
’n Studie is in Suid-Afrika gedoen om die doeltreffendheid van Avotan® Plus Pour-On (2,5% m/v fluasuron en 1 % m/v abamektien) teen bloubosluise te vergelyk met dié van ’n kommersiële opgietformulasie as verwysingsmiddel wat ook 2,5% m/v fluasuron bevat.
Die resultate van die studie het getoon dat Avotan® Plus PourOn op dag twee ná behandeling van die diere meer as 80%, en op dag drie meer as 90% doeltreffend was met die bestryding van bloubosluise. Vir 39 dae ná behandeling is ’n doeltreffendheid van meer as 90% gehandhaaf.
Op dag 14 ná behandeling was Avotan® Plus Pour-On 100% doeltreffend met die bestryding van bloubosluise, en dié persentasie is gehandhaaf tot dag 35.
By diere wat met die verwysingsmiddel behandel is, is ’n doeltreffendheid van meer as 80% teen bloubosluise eers op dag 15 behaal, meer as 90% op dag 18 en 100% op dag 22.
’n Doeltreffendheid van meer as 90% is gehandhaaf vir 36 dae en 100% vir 31 dae ná behandeling met die verwysingsmiddel.
Hierdie studie toon dat Avotan® Plus Pour-On vanaf dag 3 tot dag 60 ná die behandeling van diere met meer as 90% doeltreffend is in die bestryding van bloubosluise.
Omdat koeie fluasuron in melk uitskei, kan die nawerkende effek van Avotan® Plus PourOn by lakterende koeie korter wees as by nie-lakterende diere.
Navorsing het ook gevind dat die nawerkende effek van fluasuron by nie-lakterende Bos indicus-rasse tot 12 weke kan wees – twee tot drie weke langer asby Bos taurus-rasse – vanweë die natuurlike weerstand wat hierdie rasse teen bosluise het.
GEEN WURMS
In ’n tweede plaaslike studie is die doeltreffendheid van Avotan® Plus Pour-On teen ’n gemengde rondewurmbesmetting by beeste bepaal. Die diere was besmet met bruinmaagwurm (Ostertagia ostertagi), haarwurm (Haemonchus placei), bankrotwurm van beeste (Cooperia spp.), haakwurm ( Bunostomum spp.) en knoppieswurm (Oesophagostomum spp.).
Van 14 tot 16 dae ná behandeling met Avotan® Plus Pour-On het nekropsie plaasgevind en het die resultate van wurmherwinnings getoon dat die produk 100% doeltreffend was met die bestryding van dié wurmspesies.
STRATEGIE
MSD Animal Health beveel die gebruik van Avotan® Plus Pour-On veral aan op plase waar bloubosluise weerstand teen organofosfate, sintetiese piretroïde en amidiene toon.
Dit word ook as deel van strategiese behandeling aanbeveel met die eerste somerreën in Oktober en November op alle plase waar bloubosluise voorkom, of wanneer die eerste hoë getalle van bloubosluiswyfies waargeneem word. ’n Opvolgbehandeling word in Januarie aanbeveel.
Alternatiewelik kan ’n behandeling met Solution® 3.5% LA (reg.nr. G3689, Wet 36 van 1947) met die eerste somerreën gegee word. ’n Opvolgbehandeling met Avotan® Plus Pour-On kan in Januarie gegee word wanneer kalwers aan hul moeders suip.
NAVRAE: Webwerf: www.msdanimal-health.co.za; tel. 011 923 9300.