‘VERGEEF DIE AANVALLERS’
die week waarin die “Swart Maandag”-optogte teen plaasmoorde landwyd reaksie én omstredenheid ontlok het, het die moorddadige aanslag op die land se boere en plaaswerkers onverpoos voortgeduur.
In die nag ná die optogte van 30 Oktober is mnr. Barry Baars, ’n boer by Ficksburg en buurman van die bekende MD Foundation, in sy huis vermoor. Werkers het hom die volgende dag omstreeks 09:00 in sy slaapkamer aangetref.
Hy was een van vier boere wat verlede Dinsdag vermoor is. Daar was ook moorde by Fochville in Gauteng, Albertinia in die Wes-Kaap en Griekwastad in die Noord-Kaap.
Ds. Petrus Grové, een van Baars se bure en bestuurder van MD se gemeenskapsafdeling, Missio Dei, wat ’n plaasskool, kliniek en hospies bedryf, sê hoewel hulle diep hartseer is oor Baars se dood, glo hulle daarin om die aanvallers te vergewe.
“Ons moet die mense vryspreek en vergewe sodat ons self verlos kan word van die woede en hartseer.”
Hy meen die Here wil met al die gebeure die afgelope maande Suid-Afrikaners se oë oopmaak vir die probleme in die land. Hy glo dat almal in Suid-Afrika hier is om hoop te bring sodat versoening bewerkstellig kan word.
MAATREËLS WERK
Tog kom dit voor of boere en ander bewoners op landbougrond hul paraatheid begin opskerp het, want talle moontlike aanvalle is in dieselfde week afgeweer. Twee moontlike aanvalle is byvoorbeeld op Woensdagaand 1 November by Marble Hall en Lindley afgeweer.
By Fochville, waar mnr. Willie Barnard van die plaas Eigedie naarsfontein Dinsdagoggend doodgeskiet is, kon die polisie twee verdagtes op dieselfde dag in hegtenis neem nadat een van Barnard se werkers hulle geidentifiseer en die polisie en boere gehelp het om die verdagtes op te spoor. ’n Derde verdagte word nog in verband met dié saak gesoek.
Boere en plaaswerkers in die Vredefort-omgewing het sedert verlede Donderdag, 26 Oktober, saamgewerk om vier verdagtes op te spoor ná ’n wrede aanval op drie plaaswerkers op die plaas Stinkhoutboom. Die aanvallers het die drie werkers vasgebind en ernstig aangerand.
Volgens mnr. Tommie Esterhuyse van Vrystaat Landbou se landelike veiligheidskomitee, was die aanvallers van plan om die een werker se geslagsdele af te sny, maar die man kon daarin slaag om te ontsnap en het om hulp geroep, waarna die aanvallers gevlug het.
BRANDSTIGTING
Een aanvaller is ook Dinsdagaand aangekeer nadat hy glo na ’n plaas by Vredefort teruggekeer het waar hy op 15 Augustus aan ’n plaasaanval deelgeneem het. Esterhuyse sê mnr. Alwyn Barnard van die plaas Leeudoring is tydens die voorval in Augustus oor die kop geslaan en aangerand. Die veld is aan die brand gesteek. Toe Barnard uitgegaan het om die vuur te blus, is hy aangeval.
Die man is een van die verdagtes wat op borgtog vrygelaat is. “Dieselfde modus operandi is gevolg, met die veld wat aan die brand gesteek is om mense uit huis te lok,” sê Esterhuyse.
In die Parlement is die nuutste misdaadstatistieke die dag ná die Swart Maandag-optogte gedebatteer. Dr. Pieter Groenewald, leier van die VF Plus, het daarop gewys dat die kans dat jy in Suid-Afrika vermoor gaan word, vyf keer hoër as die wêreldgemiddelde is.
MOORDE RAAK ALMAL
Amptelike syfers van die Suid-Afrikaanse Polisiediens wys in die boekjaar 2016-’17 het moorde met 1,8% toegeneem, gewapende rooftogte met 6,4%, huisrooftogte met 7,4% en motorkapings met 14,5%.
Groenewald het gesê plaasmoorde raak elkeen, “of jy nou wit swart, Indiër of bruin is, dit raak jou, want jy eet. As die boere nie meer daar is nie, gaan jy nie ontbyt of middagete of aandete kan eet nie.”
Tydens die debat het mnr. Fikile Mbalula, Minister van Polisie, hom sterk uitgespreek teen rassiste wat ’n belangrike optog wou kaap om onenigheid te saai. Hy het gesê die ou landsvlag, wat sommiges na die optogte gebring
het, “hoort in die vullisblik van die verlede”.
“Landelike veiligheid is ’n baie belangrike saak en misdaadvlakke op plattelandse dorpe en plaasgrond is beslis ’n ernstige veiligheidskwessie wat saam met die georganiseerde landbou aangepak word.
“Daardie boere wat ek ontmoet het, wat wit is en Afrikaans praat, boere is en trotse boere is, is nie rassiste nie.
“Hulle stem met my saam oor ’n plan van aksie oor wat gedoen moet word en ek is beskikbaar om met die opposisie in die land, in besonder die Vryheidsfront, oor hul vrese en bekomernisse te praat.
“Maar dit moenie daar eindig nie, hulle moet deel wees van ons aksieplan.”
Mbalula het benadruk dat die armes gewoonlik die slagoffers van misdaad is, of dit nou op plase, in landelike gebiede of stede is.
Hy het verder gesê dat alle moorde saak maak en dat daar verlede jaar 19 015 moorde in Suid-Afrika was, waarvan 74 in landelike gebiede en op plase gepleeg is. Die 74 slagoffers sluit in swart plaaswerkers, verbygangers en wit boere.
STOP ÁLLE MOORDE
Op ’n saamtrek wat AfriForum op 30 Oktober by die Voortrekkermonument in Tshwane gehou het, het mnr. Ernst Roets, adjunk- uitvoerende hoof van AfriForum, gesê Mbalula is aandadig aan die plaasmoordkrisis en dat hy én pres. Jacob Zuma dit duidelik maak dat hulle die kwessie nie belangrik ag nie.
“Ons protesaksies is dus nie om die minister en die president te oortuig dat hulle ons probleme moet oplos nie, maar om vir die media en die internasionale samelewing te wys waarom ons dit self sal doen,” het Roets gesê.
Mnr. Ian Cameron, AfriForum se veiligheidshoof, sê daar is geen alternatief nie – “die aanslag op ons boere is ’n vorm van terreur”.