WIE IS AFRICAN RAINBOW CAPITAL?

Ubuntu-Botho Investments (UBI) is in 2004 gestig met die oogmerk om swart beheerde kapitaal op te bou deur Sanlam se bemagtigingsvennoot te word. Daarbenewens was UBI se visie om ’n verskil te maak in die lewe van gewone Suid-Afrikaners deurdat dit die vernaamste finansiëledienste-entiteit in swart besit was.

Die eerste fase was om kapitaal op te bou in vennootskap met Sanlam.

Dié doel is nou grootliks bereik met UBI wat nou sowat 14,5% van Sanlam se uitgereikte aandele besit. Die waarde daarvan is

tans sowat R17 miljard.

Die tweede fase van die visie behels die gedeeltelike belegging van kapitaal in African Rainbow Capital (ARC), wat hoop om die voorste Suid-Afrikaanse finansiëledienstemaatskappy in swart besit en onder swart beheer te word.

Die aandeelhouers in UBI is onder meer die Ubuntu-Botho Women’s Upliftment Trust, die National Education Health and Allied Workers’ Union (Nehawu), die South African Democratic Teachers’ Union (Sadtu), nagenoeg 20 kerkgroepe (waaronder die Zion-Christenkerk), openbare maatskappye en jeugtrusts.

ARC se voorsitter is mnr. Patrice Motsepe, wat ’n 55%-aandeel in UBI het. Die twee uitvoerende hoofde is dr. Johan van Zyl en mnr. Johan van der Merwe.

Laasgenoemde is in 2002 as die uitvoerende hoof van Sanlam Investments aangestel nadat hy by onder meer Investec en Gencor/Billiton gewerk het. Van der Merwe beklee steeds hierdie posisie en is ’n kundige in algemene en internasionale besigheid, asook finansiële markte en beleggings. Hy is ’n nie-uitvoerende direkteur van ’n aantal van Sanlam se filiaalmaatskappye en is ’n nie-uitvoerende lid van ’n aantal van die Sanlam-groep se direksies.