WAT SÊ ANDER BOERE?

Wêreldwyd raak weerpatrone ál meer onvoorspelbaar. Dit bring ’n al hoe groter risiko mee vir boere en maak tegnologie wat produsente daarteen verskans des te meer waardevol.

Die drie Jordaan-broers, Danie, Luan en Marius, van De Doorns het gevestigde tegnologie by Suid-Afrikaanse toestande aangepas en bekostigbaar gemaak. Dít gaan volgens mnr. Jannie Nieuwoudt van Cederwater Boerdery in die Sederberge, tussen Clanwilliam en die Koue-Bokkeveld, vir ander boere tot groot voordeel wees.

“Ek is seker die Jordaan-broers het baie kritiek uitgelok weens hul tafeldruifboerdery hier in Touwsrivier. Hulle het duidelik besluit dat hulle ’n sukses daarvan sal maak en tot ons almal se voordeel vasberade gaan wees om dit te laat slaag,” sê Jannie.

Africa Global Industries (AGI) is die maatskappy wat gestig is deur die Jordaan-groep, Beveratech, Groen Karoo Agri en Sense It Technologies. Die maatskappy se Frost Fans, wat ryp by hul tafeldruifwingerde help bekamp, gaan minder as R90 000 per hektaar (sonder aflewering en installering) kos. Volgens mnr. Raymond Gibson, eienaar van Howbill Properties, een van die grootste sagtevrugteprodusente in die Ceres-omgewing, is die koste steeds ’n ernstige oorweging.

“Die Frost Fans is ongetwyfeld die toekoms van rypbestryding, maar dit bly ’n koste-oorweging. In my lewe het ons nog nie meer as een maal in ses jaar ryp gehad nie. Dis ’n eenvoudige som: Kyk of die koste van die Frost Fans minder gaan wees as die verlies aan inkomste weens ryp,” sê Raymond.

Die Frost Fans is egter nie die enigste voorsorg wat getref kan word om ryp teen te werk nie. Jannie, wat met sagteskilsitrus boer, was ingenome met die inligting wat hy op die bekendstelling oor die Frost Fans ontvang het. “Ek gaan beslis eers die kanalisering van koue lug in die boorde implementeer. Indien dit nie werk nie, sal ek die waaiers oorweeg.”