Uganda omarm die landbou
Die Agribesigheidskongres Oos-Afrika, wat in November in Uganda vir boere, verskaffers van produksiemiddele en landbou-ondernemings aangebied word, wil die florerende landboubedryf in dié streek ten toon stel en Uganda as voorste landbougebied bemark.
Die toonaangewende landbougeleentheid Agribesigheidskongres Oos-Afrika word van 29 tot 30 November in Namulongo, Uganda, aangebied – hierdie keer as ’n volwaardige konferensie en buitelug-uitstalling by die nasionale navorsingsinstituut vir gewashulpbronne (NaCRRI). Naas verskeie kundiges van Afrika en die res van die wêreld gaan daar ook meer as 45 uitstallers wees. Gratis opleidingsessies en landboukundige konsultasies, rondetafelbesprekings, asook demonstrasies en proewe word aangebied.
“Die vinnige ontwikkeling van Agribesigheidskongres Oos-Afrika, wat vanjaar ’n volledige buitelug-ekspo gaan wees, weerspieël die florerende landboubedryf en die streek se hoë verwagtinge dat Oos-Afrika die middelpunt word van die vasteland se landboubedrywighede,” sê me. Yolanda dos Santos, geleentheidsdirekteur.
“Oos-Afrika het 145,5 miljoen verbruikers en die waarde van sy landboumark is meer as $147 miljard. Tog ontwikkel die streek se landbousektor nie vinnig genoeg om in die mark se behoeftes te voorsien nie weens ’n gebrek aan kommersialisering, meganisasie en toegang tot inligting.
“Agribesigheidskongres Oos-Afrika gaan vanjaar die vyfde keer alle belanghebbendes in die bedryf – boere, landboukenners, bedryfsorganisasies, die regering en plaaslike en internasionale verskaffers en diensverskaffers – bymekaarkry. Om ’n volskaalse buitelug-uitstalling van stapel te kan stuur, is ons vanjaar veral opgewonde om hande te vat met die NaCRRI om aan uitstallers en besoekers ’n nog beter ervaring te gee.”
Die graanraad van Uganda (TGCU) is die amptelike gasheervennoot. Mnr. Chris Kaijuka, voorsitter van die TGCU, sê Agribesigheidskongres Oos-Afrika en die buiteluguitstalling lewer ’n belangrike bydrae tot die ontwikkeling van Oos-Afrika se landbousektor deur kennis te verskaf, netwerkgeleenthede en markte te ontwikkel en ontluikende tegnologie beskikbaar te stel.
“Vir ons om werklik die geleentheid aan te gryp in Oos-Afrika, en veral Uganda, wat ontwikkel het as die nuwe voorloper vir voedsel- en graanproduksie en die vasteland se kosmandjie, moet ons byeenkom en stappe doen om die bedryf vorentoe te neem. Ons doen ’n beroep op alle belanghebbendes in die landboubedryf om hierdie goue geleentheid te benut om verskaffers, kopers en tegnokrate te ontmoet en by te dra tot die ontwikkelingsdebat.”
ONDERSTEUNING
Ander vennote sluit in die landbouraad van Tanzanië (ACT), die Alliansie vir Kommoditeitverhandeling in Oos- en Suider-Afrika (Actesa), die Gemeenskaplike Mark vir Oos- en Suider-Afrika (Comesa), die
Oos-Afrika-boerefederasie, die Oos-Afrikagraanraad, Farm Concern, die Internasionale Lewendehawe-navorsingsinstituut (ILRI) en die SA Capital Equipment Export Council (SAEEC).
Meer as duisend besoekers gaan Agribesigheidskongres Oos-Afrika na verwagting bywoon. Toegang tot die ekspo is gratis.
Net soos in vorige jare het die tegnologieen dienstebedrywe ten volle betrokke geraak met selfs meer geleenthede om hul produkte en dienste ten toon te stel.
John Deere en Mascor is die platinumborge, terwyl Case, Engsol, Tafe en Toyota goue borge is.
LANDBOUBELEGGINGS
Volgens die Ugandese beleggingsliggaam (UIA) is die landbou die belangrikste sektor in Uganda. Die landbou verskaf werk aan sowat 69% van die bevolking en het in 2015-’16 sowat 26% tot die bruto binnelandse produk bygedra. Die regering het sy bydrae tot die landbousektor in die begroting vir 2016-’17 tot UGX832,42 miljard (R3,24 miljard) verhoog – ’n verhoging van 65%.
Die belangrikste landbougewasse is graan, suikerriet, katoen, tee en koffie, en dit beloop 20% van die verdienste uit uitvoer en ’n derde van verdienste aan buitelandse valuta.
In die jongste nasionale ontwikkelingsplan word klem gelê op die belangrikheid van landbouverwerking en die waardetoevoeging van Uganda se tradisionele kontantgewasse, veral katoenpluisery, teeverwerking, die verwerking van koffiebone en die hantering van tabak.
Die UIA dui die volgende beleggingsmoontlikhede in die landbou aan: Kommersiële landbou in sowel gewasse as diere en akwakultuur; Waardetoevoeging (landbou- en voedselbedrywe); Logistiek en koue opbergingsgeriewe; Die vervaardiging van produksiemiddele (byvoorbeeld kunsmis en gifstowwe); Die vervaardiging en oprigting/montering van plaasmasjinerie en werktuie; Verpakking; en Besproeiingskemas. Nog geleenthede sluit in die vervaardiging van koringprodukte, die vinniggroeiende sektor vir melkproduksie en -verwerking, vrugteverwerking, die droog van vrugte, graanmeule en vleis- en visverwerking.
Uganda is een van die voorste produserende lande van koffie, piesangs en oliesaadgewasse, waaronder sojaboon en sonneblom. Dit lewer ook beduidende hoeveelhede tee, organiese katoen, tabak, graankos, blomme, vars vrugte en groente, neute, olies, pluimvee en varswatervis.
Die land is opgedeel in spesifieke produksiegebiede. Om logistiek, die verskaffing van landbouprodukte en die ontginning van grondstowwe makliker te maak, is al hierdie gebiede aan mekaar verbind deur ’n goeie nasionale padnetwerk.
Besoek www.ugandainvest.go.ug vir nog inligting.