TIRAMCOTTA
Ricottaroomys
180 g vars ricotta 2 eiergele 250 ml versiersuiker 5 ml vanieljegeursel 2 eierwitte 250 ml room Gerasperde skil van 1 lemoen 1 pak (200 g) vingerbeskuitjies 100 g geroosterde amandels
Koffiestroop
30 ml kitskoffiepoeier 30 ml suiker 500 ml kookwater 5 ml vanieljegeursel
Fudgesous
2 stafies (150 g elk) Kahlua-fudge 125 ml room 5 ml rum
Ricottaroomys: Meng die ricotta, eiergele, versiersuiker en vanielje goed saam. Klits die eierwitte tot sagte punte vorm en voeg by die ricottamengsel. Klits die room in ’n ander bak styf en vou by die ricottamengsel in. Voeg nou die gerasperde lemoenskil by en hou eenkant.
Meng die bestanddele vir die koffiestroop goed saam en laat afkoel. Gooi die stroop in ’n bak met ’n plat boom. Doop die beskuitjies in die koffiestroop en voer ’n geskikte bak se bodem daarmee uit (’n tweeliter-roomysbak werk goed).
Skep nou die helfte van die ricotta-roomysmengsel oor die laag beskuitjies. Sprinkel die helfte van die geroosterde amandels oor en pak weer ’n laag beskuitjies – gedoop in die koffiestroop – op die amandels. Skep nou die res van die roomysmengsel op die beskuitjielaag en sprinkel die res van die geroosterde amandels oor. Bedek en vries oornag.
Fudgesous: Krummel die fudge in ’n kastrol en voeg die room by. Verhit stadig oor lae hitte, terwyl jy roer, tot die fudge gesmelt is en ’n gladde sous vorm. Verwyder van die hitte en roer die rum by.
Keer die roomys uit op ’n bord en sit voor met die sous.