WILDBEDRYF SAL HORISON MOET VERBREED

Hoewel die wildbedryf tans in ’n drukgang is, is daar steeds geleenthede wat wink. Wildboere sal egter buite die kassie moet dink oor waarheen hulle die bedryf wil neem, want die dae van vinnig geld maak, is vir eers verby, sê mnr. Hennie Barnard, ’n lid van Summit Wildlife wat verlede maand ’n suksesvolle veiling op Graaff-Reinet aangebied het.

Barnard sê te oordeel na die uitstekende opkoms op veilings en wilddae is dit duidelik dat die belangstelling in die bedryf geensins getaan het nie. “Die probleem is egter die uitmergelende droogte in die Noord-, Oos-, Suid- en WesKaap wat boere se kontantvloei onder groot druk geplaas het. Hulle het eenvoudig nie die geld om wild te koop nie.”

Volgens hom sit veeboere wat in die laaste dekade na wild gediversifiseer het, in dieselfde penarie. Die politieke onsekerheid in Suid-Afrika laat ook diegene met geld twee keer dink oor waar hulle dit wil belê. Ná ’n goue dekade van groei was daar ’n groot aanwas in wildgetalle.

“Waar ek vyf jaar gelede nog enige prys vir my swartwitpense kon vra, is kopers vandag baie kieskeuriger. Hulle soek spesifieke teelmateriaal. Ek meen egter met die daling van 40% in wildpryse die afgelope twee jaar, is die onderste draaipunt nou bereik. Een van die geleenthede wat benut kan word, is om met die uitbreiding in wildgetalle maniere te vind om wildsvleis beter te benut en te bemark.”