Droogte: Skenkings dalk nie volhoubaar
DIE gebrek aan inkomste weens die droogte beteken dat vele boere nie hul skuldverpligtinge kan nakom nie, het mnr. Henk van Wyk, voorsitter van Agri NoordKaap, op Agri Namakwaland se onlangse jaarlikse kongres gesê.
“In twee jaar van sulke omstandighede kan ’n eens welvarende boer van finansiële welvaart tot finansiële ondergang vorder.”
Van Wyk sê boere in die droogtegebiede kan baie dankbaar wees oor die rekordmielie-oes wat die
mielieprys laat daal het en dat boere in die somersaaigebiede hul hande en harte oopgemaak het.
“Dit het gemaak dat ons langer kan oorleef in die droogte omdat ’n sak mielies wat verlede jaar op Calvinia R250 gekos het, nou R140 kos. As die prys nog R250 per sak was, was daar min boere in dié wêreld oor.”
Van Wyk sê die boere het “verskriklik baie empatie” met hulle, maar wonder hoe volhoubaar die voerskenkings is. Tydens sy onlangse besoeke aan die mieliegebiede moes hy dikwels hoor met hoeveel oorlaatskuld boere sit. “Toe die eerste somerreën val, het hulle gewonder wat om te plant, want dit lyk of daar ’n oordragvoorraad van 5,5 miljoen ton mielies gaan wees.”
TE VER AGTER
Van Wyk sê hy voel amper magteloos, en weet nie waar om te begin om ander planne te beraam nie, veral as hy weet die departement van landbou in die Noord-Kaap is hulle goedgesind, maar kan nie veel doen nie. “Ons kyk met jaloerse oë na die hulp wat boere in die Wes-Kaap kry. Daar is nog proefplase wat werk, en die winste word vir droogtehulp aangewend.”
Van Wyk het gesê die Land Bank se lenings om die droogte te oorbrug, is nie die regte ding nie. “Dis ’n reddingsboei om deur die droogte te kom. Baie boere is egter te ver agter om die reddingsboei te vat.”