Daar ís nog ’n blink kant aan SA
HOEWEL Suid-Afrikaners daagliks met slegte nuus gebombardeer word, is daar ook goeie nuus. Per slot van rekening is sake in die land glad nie so sleg as wat dikwels voorgehou word nie, sê mnr. Dave Mohr, hoofbeleggingstrateeg by Old Mutual.
Mohr was een van die hoofsprekers op ’n beleggingskonferensie wat die Alexandria-melkstudiegroep onlangs by Seaview aangebied het.
Hy sê dat die goeie reën, die oplewing in die wêreldekonomie, ’n styging in kommoditeitspryse, die verlangsaming in die inflasiekoers en die verbetering van kraglewering goed vir die landbou en verbruikers is.
Aan die ander kant is die Regering op soek na meer geld om die staatskas aan te vul en kan hoër belasting met die volgende begroting te wagte wees.
Die moontlikheid dat BTW met tot 2 persentasiepunte verhoog kan word, kan nie uitgesluit word nie.
“Politieke onsekerheid kan
selfs ná die ANC se beleidskonferensie in Desember voortduur, en verbruikers sal traag bly om geld te bestee,” sê Mohr.
GROEIKOERS
Hy meen daar kan uitgesien word na ’n hoër ekonomiese groeikoers, en die gevaar om weer in ’n resessie terug te val, is taamlik skraal.
Mohr voorsien ook nie dat die kredietgraderingagentskappe Suid-Afrika tot op dieselfde vlakke as Brasilië en Turkye sal afgradeer nie. Hy meen ook die rand se waarde sal op kort termyn stabiel bly, veral indien die onlangse styging in internasionale kommoditeitspryse voortduur.
Volgens hom bestaan daar nog uitstekende beleggingsmoontlikhede in Suid-Afrika.
“Die gesegde om nie al jou eiers in een mandjie te plaas nie, bly egter waar. Daarom kan beleggers hul risiko verskans deur ook geld in die buiteland te belê of in maatskappye op die aandelebeurs wat in die buiteland genoteer is.”
KABINET
Dr. Frans Cronjé, uitvoerende direkteur van die Instituut vir Rasseverhoudinge, het op dieselfde geleentheid gesê die toekomsverwagtinge vir die land
hang nie soseer van die ANC se beleidskonferensie in Desember af nie, maar van wat die Kabinet in 2019 gaan doen. “Hy het twee breë rigtings om in te slaan, naamlik om die nodige beleidsaanpassings te maak wat buitelandse kapitaal sal lok en ekonomiese groei aanmoedig, of om al hoe meer outokraties te raak namate die staatskas uitgeput word.”
Hy sê die instituut se sentrum vir risiko-ontleding het vier moontlike scenario’s voorberei oor wat in die volgende paar jaar kan gebeur. Die ANC kan skerp na regs draai en ekonomiese hervormings toepas om ekonomiese groei teen 2020 tot 5% te laat styg.
Die tweede scenario is dat die ANC skerp na links swenk en grond herverdeel en rassespanning laat toeneem.
Die derde moontlikheid is dat die ANC sy meerderheid verloor en ’n breë koalisie met ander partye vorm, wat ekonomiese groei teen 2020 tot 3% kan laat styg.
Die vierde moontlikheid is dat die ANC-leiers sodanig met mekaar stoei dat niemand ’n idee het wat die Regering se beleid werklik is nie. Die groeikoers sal skerp afneem en die bevolking sal al hoe meer in politieke enklawes inbeweeg om op plaaslike vlak na hul eie belange om te sien.
Cronje het boere aangeraai om sover moontlik te diversifiseer om nie deur ’n vyandige Regering onkant gevang te word nie.
“As jy en jou gesin keuses het, kan jy op jou boerdery konsentreer om ’n sukses daarvan te maak. Neem beheer oor jou eie sake. Boere wat goed verskans is en keuses het, kan dit selfs oorweeg om nog grond by te koop,” het Cronje aan Landbouweekblad gesê. –