DIE ANDER SÊ
DIE jongste verslag van die Verenigde Nasies (VN) se omgewingsprogram (UNEP) oor uitlaatgasse toon ’n “katastrofiese” gaping tussen lande se ondernemings om kweekhuisgasvrystelling te verminder en die stappe wat wel gedoen is om aardverwarming te stuit.
Suid-Afrika het nie, soos beoog, in Januarie ’n koolstofbelasting ingestel nie. Plaaslike kenners van klimaatsverandering is besorg dat die vertragings kan lei tot twyfel oor die Regering se verbintenis tot die vermindering van kweekhuisgasse.
Die wetsontwerp op koolstofbelasting is in November 2015 gepubliseer met ’n toepassingdatum van 1 Januarie. ’n Hersiene wetsontwerp is teen middel vanjaar beloof en mnr. Malusi Gigaba, Minister van Finansies, sê nou dit sal “binnekort” gepubliseer word.
Suid-Afrika is lid van die VN se Parys-verdrag oor klimaatsverandering en onderneem kragtens dié ooreenkoms om sy vrystelling van kweekhuisgas teen 2020 met 34% te verminder.
Mnr. Brent Cloete van DNA Economics sê Suid-Afrika is ver van sy uitvoermarkte, met buitensporig koolstofintensiewe elektrisiteitstoevoer. “Dit lei tot hoë vlakke van kweekhuisgasvrystellings wat in Suid-Afrikaanse uitvoer vergestalt word. Dit is dus geen verrassing nie dat wanneer die impak van die internasionale koolstofverminderingsbeleid oorweeg word, Suid-Afrika uitgewys word as een van die lande (indien nie dié land nie) wat die grootste gevaar loop om uitvoer-mededingendheid te verloor vanweë die pogings van sy handelsvennote om die vrystelling van kweekhuisgasse te verminder.”