AGRI SA BAKLEI VOORT TEEN GAS-EKSPLORASIE
AGRI SA het appèl aangeteken teen omgewingsmagtigings aan die petrochemiese maatskappy Rhino Oil and Gas vir uitgebreide eksplorasie vir olie en gas.
Dié magtigings, wat mnr. Mosebenzi Zwane, Minister van Minerale Hulpbronne, op 2 Oktober toegestaan het, beteken nie Rhino mag nou met eksplorasie begin nie, maar is ’n voorvereiste vir die toestaan van uiteindelike eksplorasieregte.
Só sê mnr. Janse Rabie, hoof van natuurlike hulpbronne by Agri SA.
Rhino se beoogde eksplorasie strek oor altesaam 2,4 miljoen hektaar in die Vrystaat, Noordwes, KwaZulu-Natal en die Oos-Kaap.
Die omgewingsmagtigings is ingevolge die Wet op Nasionale Omgewingsbestuur deur Zwane
uitgereik, maar die appèlle daarteen moet vir beslissing na me. Edna Molewa, Minister van Omgewingsake, gaan, sê Rabie.
Haar beslissing behoort teen vroeg volgende jaar bekend gemaak te word. As die appèlle nie slaag nie, het Agri SA ook die opsie om hom tot die hof te wend om eksplorasie te stuit, sê hy.
KOMMER VOORTYDIG
Rabie meen kommer oor of die omgewingsmagtigings beteken dat chemiese mengsels wat die Karoo se skaars waterbronne kan besoedel, byvoorbeeld nou
in boorgate gegooi mag word om eksplorasie te doen, in hierdie stadium voortydig is.
“Geen fisieke eksplorasie mag plaasvind voor die appèlle afgehandel is nie. Daar is dus in hierdie stadium geen sprake daarvan nie,” sê Rabie.
Agri SA het boere vroeër gewaarsku dat eksplorasie-aansoeke vir skaliegas vanaf die heel eerste fase beveg moet word, want dit kan maklik outomaties tot hidrobreking lei.
Dit was te midde van berigte dat die Petroleumagentskap van Suid-Afrika (Pasa) op die punt is
om sy eerste aanbevelings oor die toestaan van eksplorasiepermitte vir skaliegas te gee.
’n Reeks petrochemiese maatskappye, onder wie Rhino, het reeds om eksplorasieregte in elke provinsie van Suid-Afrika aansoek gedoen. Dit sluit groot dele van onder meer die Kalahari, die Waterberge, Noordwes, die Vrystaat en die Karoo in.
Agri SA se raad aan grondeienaars wat deur sulke aansoeke geraak word, is om dadelik Agri SA of hul provinsiale landbouorganisasies om hulp te kontak.