Boere moet politiek kan praat
DIE toekoms van die wildbedryf lyk tans nog veilig, maar dit is belangrik dat dit op ’n volhoubare manier bestuur word en dat wildboere se boodskap verstaanbaar aan die politici oorgedra word.
Dít was die ekoloog mnr. Dave Pepler se boodskap op Wildbedryf SA (WRSA) se Oos-Kaapse Wildboer van die Jaar-prysuitdeling op Jeffreysbaai.
Pepler sê dit is onbillik om te verwag dat politici die omgewing moet verstaan soos wat ’n wetenskaplike dit verstaan. Net so sal dit onbillik wees om te verwag dat ’n ekoloog politiek moet verstaan.
Volgens hom behoort organisasies, soos WRSA, kundiges op te lei om namens die bedryf op ’n politieke vlak te kan kommunikeer.
WAARDE VAN WILD
“Daar is geen twyfel dat jag ’n rol speel in volhoubare bewaringspraktyke
nie, maar die grootste ekologiese doelwit bly om die unieke plek van elke organisme in die omgewing te begryp,” sê hy.
“Die muskiet en die miskruier, byvoorbeeld, het elkeen aangepas by sy omgewing. Al is hulle so klein, speel elkeen ’n rol in die funksionering van die ekostelsel. Ons het geen benul wat die gevolge sal wees as een van dié spesies uitsterf nie.”
Pepler het wildboere ook gemaan om mooi te besin oor die moontlike impak van genetiese modifikasie op die bedryf.
“Genetika is ’n gewilde besprekingspunt met baie plase wat klem lê op die teling van uitstekende diere. Tans word CRISPR (Clustered Regularly Interspaced Short Palindromic Repeat) in die menslike gesondheidsveld ingespan. Dit is ’n tegniek waarmee spesifieke gene in ’n organisme verander kan word. Wildboere moet nou al besluit of dit ’n probleem kan word vir hulle en indien wel, hoe gou dit kan gebeur.”
2017 SE WENNERS
Mnr. Richard Morton, 2016
se Oos-Kaapse Wildboer van die Jaar, het gesê groot dinge is moontlik vir boere wat passievol daaroor is om diere op ’n etiese manier te teel en te bemark.
Mnr. Warrick Barnard van Woody Cape Wildlife is vanjaar se Wildboer van die Jaar en mnr. Johan Bouwer (L’Ormarins Farms) was die Bewaringswildboer van die jaar. Me. Katjana Ott (Glen Harry-wildreservaat) is die Wildteler van die Jaar en mnr. Loodt Büchner (Tootabi Hunting Safaris) is die Wildondernemer van die Jaar.