Ontwikkelaar mag historiese landgoed koop
DIE Mededingingskommissie het ingestem dat die historiese Stellenbosse wynlandgoed Blaauwklippen aan Quefin, die filiaal van ’n eiendomsontwikkelaar, verkoop mag word.
Dit het vrae laat ontstaan oor die toekoms van dié wynplaas wat tans aan ’n Duitse maatskappy, Blue Lion GmbH, behoort. Benewens die wingerde, ’n bistro en trou- en konferensielokale is die plaas ook ’n gewilde toerismebestemming en veral bekend vir sy naweekmarkte. Die plaas is tussen die R44-pad en die woonbuurt Paradyskloof geleë.
Mnr. Rolf Zeitvogel, besturende direkteur van Blaauwklippen, het gesê dit is nog te vroeg om kommentaar te lewer op die saak. “Niks is afgehandel nie. Die partye praat nog oor die laaste punte van die proses.”
335 JAAR OUD
Blaauwklippen maak wyn, vonkelwyn, brandewyn, jenewer en snaps vir die plaaslike en uitvoermark. Die landgoed het ’n geskiedenis van 335 jaar en die eerste wingerd is in 1688 op die plaas geplant.
In 1899 het die plaas vir net een dag aan Cecil John Rhodes, destydse eerste minister van die Kaapkolonie, behoort.
Blaauwklippen was ook een van die eerste lede van die Stellenbosch-wynroete, die eerste in sy soort in Suid-Afrika.
Volgens die landgoed se web- werf was dit een van die eerste plase in die land wat wingerde teen ’n hoë digtheid aangeplant het (5 555 stokkies/ha).
Luidens ’n verklaring deur die Mededingingskommissie is die kans skraal dat die voorgenome transaksie mededinging op die mark sal verhoed of verminder. “Die voorgestelde transaksie wek ook nie kommer oor enige openbare belange nie.”
KOMMERSIEEL
Die pas gestigte Quefin behoort in sy geheel aan ATMG Holdings, wat deur die Groenpunt-trust en die ATM-beleggingstrust beheer word. Die ATM Groep is hoofsaaklik ’n eiendomsontwikkelaar en -bestuursmaatskappy met sy hoofkantoor in Stellenbosch en streekskantore in Kimberley en Kathu.
“Die groep spesialiseer in die ontwikkeling van kommersiële kantoorparke, kleinhandel-inkopiesentrums, medium- en hoë-inkomste- residensiële ontwikkelings en gesondheidsorgen hospitaalgeriewe. Die groep is ook betrokke by die bestuur van kommersiële eiendomme en die verkoop en verhuring van eiendomme. Die groep hou ook sekere nie-eiendomsverwante private ekwiteitsbeleggings,” luidens die verklaring.
Zeitvogel het gesê hulle sal binnekort meer inligting oor die transaksie kan bekend maak. “Ons behoort oor ’n maand meer te weet en sal dan ’n volledige verklaring uitreik.”