HIER IS HULP VIR KAROOBOERE

DIE jarelange droogte in die Karoo dreig om langtermyntrauma by boere en hul gesinne te veroorsaak en kan meebring dat hulle moedeloos raak.

Om die boere te help en te ondersteun, bied LandCare, ’n afdeling van die Wes-Kaapse departement van landbou se direktoraat vir volhoubare hulpbronbestuur, ’n droogtehulpwerksessie op Prins Albert aan.

Alle Karooboere is welkom om dié werksessie op Dinsdag 28 November op die skouterrein op Prins Albert by te woon.

Die sprekers, met die tema van hul praatjies tussen hakies, is dr. Louis du Pisani van die Nasionale Wolkwekersvereniging (Wat kan jy aan die droogte doen?), me. Helene Smit, ’n traumaberader van Prins Albert (Wat kan die droogte aan jou doen?), prof. Sue Milton van Renu-Karoo, Prins Albert (Wat doen die droogte aan die veld en wat lê vir ons voor?), me. Phyllis Pienaar van LandCare op Beaufort-Wes (Hoe doen jy aansoek om droogtehulp?) en prof. Beatrice Conradie van die Universiteit van Kaapstad (Wat doen die droogte aan die gemeenskap?).

Bywoning is gratis en middagete, tee en koffie sal aan boere verskaf word.

Registrasie is vanaf 08:00 en die werksessie begin om 08:50 met ’n verwelkoming deur mnr. Francis Steyn, hoof van LandCare in die Wes-Kaap.

Landbouweekblad ondersteun die werksessie as mediavennoot.