BRASILIË | Vleisskandaal vreet winste
JBS, die wêreld se grootste vleisverwerker, se netto wins het in die nadraai van ’n voedselveiligheidskandaal en ’n korrupsie-ondersoek met 63% op ’n jaargrondslag gedaal — vanaf 887 miljoen real (R3,9 miljard) tot 323 miljoen real (R1,4 miljard).
Dit is die eerste keer dat die maatskappy resultate aankondig sedert mnre. Wesley en Joesley Batista, onderskeidelik sy skatryk voorsitter en besturende direkteur, in hegtenis geneem is in verband met die skandaal. Die broers het in Oktober skuldig gepleit op die aanklag van korrupsie in ruil vir ligter vonnisse. Die maatskappy het toe egter die twee se 84-jarige pa as besturende direkteur aangestel, tot groot ontsteltenis van Brasilië se nasionale ontwikkelingsbank, een van die aandeelhouers.