KRY HULP BY TOERLEIERS
Boere wat hulp nodig het om vakansies te reël of aan ’n georganiseerde toer wil deelneem, kan verskeie reisagentskappe nader.
Bluerhino Safaris
Wil jy op die Okavango-delta vaar? Of miskien deur Zambië toer na die groot Skeurvallei, verby Kilimandjaro en diere kyk in die Ngorongoro-krater en die Serengeti?
Wil jy dalk op die strand van die Malawi-meer slaap?
Bluerhino Safaris spesialiseer in aksiebelaaide kampeertoere met gidse. Hulle bied ook pasgemaakte toere om aan jou behoeftes te voldoen.
Die onderneming bied kort toere – ’n viernagtoer in lodges in Lesotho – en langer toere – ’n wildebeesmigrasietoer van 32 dae in Tanzanië. Jy bring jou 4x4-voertuig, kos en kampeergoed, en die res word verskaf. ■ Besoek www.bluerhino.co.za vir nog inligting.
Van Dyk Toere
Om die billikste buitelandse toere vir Suid-Afrikaners aan te bied, sonder om gehalte in te boet, is Van Dyk Toere se visie.
Die onderneming organiseer groeptoere na Europa, Asië en die Amerikas en probeer om elke jaar ’n nuwe toer na ’n unieke bestemming by te voeg.
Vir 2018 is die gewildste toer die toer na Amerika, Kanada en Alaska, maar dit is reeds volbespreek.
Staatmaker-toere wat elke jaar aangebied word, is die groeptoer na Viëtnam, Kambodja en Singapoer, en die Kroasië Kostekerwer-toer.
Van Dyk Toere het vanjaar vir die eerste keer ’n toer na die pêrels van Pole (gekombineer met Praag, Dresden en Berlyn) aangebied. Dié toer word volgende jaar in Julie herhaal. ■ Besoek www.vandyktours. co.za vir nog inligting.
Christine van Wyk Toere
Die Rynvaart, Duitsland, is Christine van Wyk Toere se vlagskiptoer en word sedert 1980 aangebied. Dit, tesame met ’n besoek aan Keukenhof, Nederland, die grootste lentetuin in die wêreld, bly ’n unieke ervaring.
’n Mens ontspan op die boot terwyl die pragtige Nederlandse, Duitse en Franse natuurlandskap by jou verby beweeg. Tydens die vaart stap jy aan wal by verskillende dorpies en stede. ■ Besoek www.travelentoer. co.za vir nog inligting.