Maak tyd vir geldsake
Elke landbouer behoort ’n volledige finansiële ontleding te laat doen. Mnre. Theo Potgieter, hoof van UNIGRO Versekering, Lucas Coetsee, ’n regspesialis verbonde aan Liberty, en Pieter van Schalkwyk, ’n finansiële adviseur van UNIGRO Versekering, gee raad
Kliënte se omstandighede verskil en elkeen se behoeftes is uniek. Gevolglik sal één plan nie almal pas nie. Wat dit boonop ingewikkelder maak, is dat kliënte se kort- en langtermyndoelwitte gereeld hersien moet word.
Finansiële beplanning bestaan uit verskillende aspekte wat aan mekaar gekoppel is. Dus is dit moeilik om al die behoeftes van ’n kliënt in ’n enkele ontleding saam te vat.
Belasting en aftree- en boedelbeplanning is net enkele van die boustene wat deel vorm van die finansiële beplanning waarvoor ’n spesialis se advies nodig is.
FINANSIËLE ONTLEDING
Voordat ’n ontleding saamgestel kan word, moet die kliënt eerder te veel as te min inligting verskaf.
Sonder voldoende inligting kan die aanbevelings wat gegee word, die kliënt in die verkeerde rigting stuur. Die gevolg is dat doelwitte nie bereik word nie.
Selfs al het jy ’n paar jaar gelede ’n finansiële ontleding laat doen, kan ’n verandering in wetgewing of enige verandering in omstandighede daartoe lei dat die ontleding dadelik hersien moet word. Ongelukkig word daar te midde van die daaglikse geharwar kwalik genoeg tyd opsygesit om ’n behoorlike finansiële ontleding te laat doen.
BELASTING
Namate die markwaarde van bates groei, word kapitaalwinsbelasting ’n al hoe groter kwessie. Dit is reeds 16 jaar dat hierdie soort belasting ’n groot impak het op die likiditeit wat in ’n boedel beskikbaar is. Die insluitingskoers vir ’n individu is juis vir die 2017-belastingjaar van 33,3% tot 40% verhoog, wat die likiditeit verder onder druk plaas.
BOEDEL
Die likiditeit in ’n boedel word ook deur ander faktore beïnvloed, soos krediteure, onderhoudseise en administrasiekoste (waaronder eksekuteursgeld, transportkoste met die oordrag van ’n vaste eiendom, meestersgeld en advertensiekoste).
Probleme ontstaan wanneer daar nie vir dié uitgawes voorsiening gemaak is nie en die boedel nie oor genoeg kontant beskik om te verseker dat bates in die naam van erfgename oorgedra kan word nie.
Verkeerde strukturering van polisse of polisse wat gesedeer word vir skuld waar dit oorspronklik ’n ander doel gedien het, kan ook nadelige gevolge hê. Dit is ’n jammerte dat die meeste kliënte onder die indruk is dat ’n lewenspolis wat aan ’n persoon buite die boedel begunstig is, nie aan die betaling van boedelbelasting onderhewig is nie.
Die tydperk vir die afhandeling van bestorwe boedels is deesdae ook al hoe langer. Vermy so ’n situasie deur jou testament gereeld te hersien.
Onthou, ’n testament vorm deel van ’n finansiële ontleding. Dit is belangrik dat al die finansiële doelwitte vir jou plaas en jou naasbestaandes behoorlik in die testament aandag kry.