Suiker: Parlement dwing transformasie af
DIE volgehoue vlaag misdadige aanvalle op boere en hul werkers veroorsaak ernstige skade en onsekerheid in die landbousektor, sê mnr. Senzeni Zokwana, Minister van Landbou, Bosbou en Visserye.
Zokwana is een van menige invloedrykes wat saamstem dat iets daadwerkliks aan die situasie gedoen moet word en dat die Swart Maandag-optogte wat plaasgevind het, “nie gesien moet word as boere wat probeer om die Regering aan te val nie”. Hy wil graag hê staatsdepartemente en landbou-organisasies moet saamwerk om die wrede plaasaanvalle gesamentlik die hoof te bied.
BERAAD IN 2018
In hierdie gees onderneem Zokwana nou om vroeg volgende jaar ’n beraad oor geweld teen landelike gemeenskappe te hou, waarvan die relevante belanghebbendes, soos plaasgemeenskappe en ministers van verskeie portefeuljes, deel sal wees. Mnr. Fikile Mbalula, Minister van Polisie, het
dit ook onomwonde gestel dat boere en die landelike gemeenskap ondersteuning en beveiliging van die polisie benodig.
Zokwana sê op die beraad sal die kwessie van geweld in detail bespreek word en geskikte oplossings sal ontwikkel word.
Intussen sal sy departement voortgaan om te verseker dat alle relevante staatsdepartemente en -agentskappe betrokke raak by die stryd teen plaasmoorde.
“Die departement verbind hom daartoe om saam met belanghebbendes in die sektor te werk om te verseker dat daar maksimum deelname van die plaasgemeenskappe by onderrig en opleiding oor hul menseregte en regte sal wees.”
SWAAR TYE
Volgens Zokwana is dit byna onmoontlik om die impak van plaasaanvalle op belegging in die landbou, asook die uitbreiding van die sektor, werkskepping en voedselsekerheid te bepaal. Dit is omdat dié gebeure afspeel in ’n tyd waarin ander faktore, soos die droogte, kommandowurms, voëlgriep en oorstromings, ook ’n nadelige impak op landbouproduksie gehad het.
Zokwana waarsku dat SuidAfrika se ekonomie en voedselsekerheid ernstig in die gedrang gebring word as die huidige situasie voortduur en alle belanghebbendes nie die nodige aandag daaraan skenk nie.
Voortspruitend uit Mbalula se
gesprek in September met Agri SA oor plaasaanvalle en Mbalula se eis dat hy ’n aksieplan wil sien, het ’n taakspan van die polisie ’n plan saamgestel wat onlangs met Agri SA bespreek is. Mnr. Kobus Visser, direkteur van korporatiewe skakeling by Agri SA, sê hoewel besonderhede daaroor nie nou bekend gemaak kan word nie, is hy optimisties oor wat op die tafel is.
“Ons het ook insette gelewer en die polisie sal die voorstelle nou intern finaliseer en aan die minister vir goedkeuring voorlê. Alles hang nou af van sy goedkeuring en dan natuurlik ook oor hoe goed dit in werking gestel gaan word.”