Stof gaan lê oor swart Boerboele . . . en verkoop vir tot R130 000 stuk
Die stof het eindelik gaan lê oor Boerboele met ’n swart haarkleed, en plaaslik en veral in die buiteland vind telers en kopers sterk aanklank by dié swart honde met die gloeiende oë . . .
Swart Boerboele het hul plek volgestaan op die afgelope nasionale skou van die Suid-Afrikaanse Boerboeltelersgenootskap (SABBS) in Bloemfontein. Die byeenkoms het ’n rekordgetal van 290 inskrywings gelok – bykans honderd meer as ’n jaar gelede.
Ná die bohaai en regstryd oor die ras se aanvaarbare kleure en besware deur die Departement van Landbou, Bosbou en Visserye oor die genootskap se grondwet, is die vure geblus en mag swart honde nou met trots as rasegte Boerboele op die skou vertoon word.
Belangstelling in swart Boerboele het sedertdien die hoogte ingeskiet, sê mnr. Jakkie Erasmus van die Sumsaré-stoetery van Port Elizabeth. “Die mense is gaande oor die swart haarkleur. Maar die swart hond moes ’n baie moeilike pad stap. Ná vier jaar se hofsake is hy nou weer waar hy hoort. Daar bestaan egter nie so iets soos ’n swart Boerboel nie. Dit is ’n Boerboel en klaar.”
Die twis oor die honde se kleur as rasstandaard het begin toe mnr. Joel Mamabolo, die registrateur van diereverbetering, geweier het om swart as ’n toelaatbare haarkleur in die rasstandaard van die SABBS te aanvaar.
Dié rasstandaard is op twee agtereenvolgende jaarvergaderings deur die lede goedgekeur. In 2015 is die swart kleur ingestem en verlede jaar het die jaarvergadering dit as deel van die rasstandaard herbevestig.
Ingevolge ’n appèlbeslissing in Julie vanjaar is die registrateur daarop gewys dat hy nie by magte is om met die rasstandaard van enige telersorganisasie in te meng nie.
GROOT BUITELANDSE BELANGSTELLING
Jakkie het van kindsbeen af saam met swart Boerboele in die Oos-Kaap grootgeword. “Toe het hulle om die een of ander rede van die toneel verdwyn.”
Hy en die teler mnr. Lukas van Vuuren van die Spitsvuur-stoetery by Heilbron het egter sowat 15 jaar gelede weer swart honde in die Vrystaat opgespoor en hulle in hul onderskeie teelprogramme ingesluit. Daar was gevolglik ’n toename in hul gewildheid onder telers en kopers.
“As telers nie versigtig is nie, gaan jy al hoe meer swart honde kry. Dit is egter nie die bedoeling nie. Ons wil nie swart Boerboele teel nie, maar wel Boerboele, ongeag die kleur.”
Veral buitelandse hondeliefhebbers is gaande oor die swart honde. “Die swart dier is by uitstek geskik as waghond omdat hy of sy so moeilik in die donker sigbaar is.”
Die ras se gewildheid hou vir Jakkie ook ’n vermaning in. “Ons moet versigtig wees om
nie by uitstek skouhonde te teel nie, maar die fyn balans te behou in die teling van funksionele waghonde. Die onoordeelkundige teling van skoudiere kan enige ras benadeel.”
Sy hoofaanbeveling vir telers is die beweeglikheid van die dier. “Sodra ’n hond te swaar word, beweeg hy moeiliker en benadeel dit sy vrugbaarheid. Te groot diere sukkel met natuurlike dekking. Kunsmatige inseminasie moet dan toegepas word en tewe kan nie natuurlik geboorte gee nie.”
Die kop van die ideale Boerboel is die hoofeienskap waarna die SABBS streef. “Indien ’n hond op ’n afstand oor ’n heining loer, moet jy hom dadelik as ’n Boerboel kan eien voor jy die res van hom kan sien,” sê Jakkie.
Benewens die “fantastiese” kop van die ideale Boerboel moet hy ’n reguit toplyn hê en ’n gespierde agterlyf om sterk, voorwaartse beweging moontlik te maak.
’n Teelneiging wat Jakkie in die ras bespeur, is swaarder honde met beter bespiering, maar wat nie noodwendig hoër van postuur nie. “Telers moet versigtig wees dat hulle nie sekere eienskappe oordoen nie.”
Twee van Jakkie se swart honde, LouAndré Baron en Sumsaré Hercules, het ’n tyd gelede al ’n allemintige R130 000 elk in ’n private transaksie behaal.
DEELNAME VERWELKOM
Mnr. Koos van der Westhuizen, voorsitter van die SABBS, het die eerste amptelike deelname van die swart honde aan ’n skou onder die genootskap se vaandel verwelkom.
Koos, ’n gerekende teler van Middelpos tussen Sutherland en Calvinia, sê vanjaar se SABBS-skou is die grootste van enige rasegte honderas in Suid-Afrika.
“Danksy gereelde buitelandse belangstelling en deelname sal die skou voortaan as die internasionale SABBS-skou bekend staan. Na verwagting sal meer buitelandse telers hul diere hier vertoon.”
Die SABBS aanvaar ingevolge die Wet op Diereverbetering (Wet 62 van 1998) net Boerboele wat by SA Stamboek geregistreer is. Minstens drie buitelandse genootskappe – die Boerboel-genootskap in Brittanje en ’n Australiese en Nigeriese groep – is by SA Stamboek geaffilieer.
‘BESTE HONDE IN SUID-AFRIKA’
Mnr. Dolph Carstens, die Europese verteenwoordiger van die SABBS wat al die afgelope 17 jaar in Brittanje woon, sê hy ondervind groot belangstelling in die ras, veral in Nederland. “Daarna volg die Skandinawiese lande, Engeland, Portugal en Duitsland, waar die Boerboel baie gesog is.”
Die Europese mark vir die Boerboel kan volgens hom nie met Suid-Afrika vergelyk word nie. “Dit is ’n nismark en dié hondeliefhebber hou van ’n groot, sterk mastifftipe dier.”
As ’n mede-beoordelaar saam met mnre. Danny Human, Johan van Wyk en Johan Blomerus was hy beïndruk met die gehalte van die honde op die skou. “Die beste honde van die ras is in Suid-Afrika.”
Hy het ook van die swart honde op die skou gehou. “Die meeste honde van die ras in Europa is bruin en geel, maar noudat swart Boerboele ten volle aanvaar word, sal die vraag in Europa ook toeneem,” sê hy.
IDEALE AFSKRIKMIDDEL
Die Noxterra-telery van mnr. Billy Slate van Essex, Engeland, het tans 13 teelhonde en 12 klein hondjies. Hy ondervind ’n geleidelike toename in die belangstelling in sy honde. “Daar was die afgelope drie jaar beslis meer belangstelling in die Boerboel teenoor die tyd toe ek die ras raakgeloop het.”
Hy het eers met die Bullmastiff geteel omdat hy van die groot bou van dié honde hou. Toe hy nie sy honde kon vervang nie, het hy op ’n foto van ’n groot, swart hond afgekom wat sy belangstelling geprikkel het.
Dit was Lukas se bekende Spitsvuur Ramkat wat hom uiteindelik in 2015 na Suid-Afrika gelei het. Sy eerste aankoop was ’n teef, MES Madison, wat deur Ramkat gedek is. Die eerste werpsel was twee swart tefies in Januarie 2016.
Hy is in Brittanje as die “mal hondeman” bekend. Sy belangstelling het om al drie keer na Suid-Afrika gelei.
Hy het aanvanklik die swart honde verkies, maar gaandeweg die ander kleure leer liefkry. As waghond wat snags net twee oranje oë vertoon, is die swart hond die ideale afskrikmiddel vir boosdoeners, sê hy.
Volgens sy beraming is daar agt tot twaalf ernstige Boerboeltelers in sy land wat meer as vyf honde het en gereeld werpsels oplewer. “Ons bied jaarliks skoue en rasbeoordelings aan. Dié bedryf kry momentum en ek is trots om daaraan deel te neem.”
’n Geregistreerde jong hondjie kan tot £1 500 (R27 750) in Brittanje kos, terwyl
uitstekende nageslag ’n teler maklik tot £2 000 (R37 600) elk uit die sak kan jaag. “Die beste honde in Brittanje is uit Suid-Afrika ingevoer,” sê Billy.
Op ’n onlangse skou was die eerste drie wenners in die klas vir volwasse reuns én tewe ingevoerde honde uit Suid-Afrika. “Die gehalte van die ras in Brittanje is in die algemeen aan die verbeter.”
ITALIANERS OOK GAANDE OOR SWART
Een van die buitelanders wat geesdriftig aan die skou deelgeneem het, is mnr. Mauro Coni van Rome, Italië. Sy besoek aan Bloemfontein is sy vierde plaaslike besoek op soek na goeie teelmateriaal. Vorige besoeke het reeds ’n werpsel in sy tuisland opgelewer.
Die getroue aard van die ras maak die Boerboel vir hom die ideale gesinshond. Hy hou tans twee volwasse honde aan en drie wat hy uit die eerste werpsel teruggehou het.
“Italianers ken nie die ras nie en na my wete is ek die eerste teler in my omgewing,” sê hy.
“My landgenote is veral gaande oor die swart honde. Derhalwe soek ek na ’n geskikte swart hond vir my telery.”